تركيا البلد اللي  كل مدينه فيها ليها طعم مختلف عن غيرها ، كل مدينه ليها روح ،  ليها اكله مميزه بيها ،  ليها حاجه مختلفه
رحلة تركيا 
 تركيا من أفضل الأماكن في اوربا وفيها انشطة ومعالم كتيرة ممكن تزورها وتقضي هناك احلي ويك اند ميتنسيش

موضوعنا النهاردة هنتكلم فيه عن أجمل 3 مدن في تركيا وبرنامج سياحي مميز تقضي فيه أحلي 6 ايام ممكن تقضيهم في حياتك

 

تعرف علي 3 من أجمل مدن تركيا والسياحة بهم 

 

مدينة فتحية : اهم المزارات والانشطة اللي ممكن تعملها بالمدينة 

1- القفز بالمظلة (Paragliding ) من أعلى جبل بفتحية أسمه babadağı وتكلفته حوالي 100 دولار ..

2- رحلة بحرية لزيارة 12 جزيرة بفتحية .. 

3-  زيارة شاطئ أولودينيز ..

4-  التجديف أو مايعرف ب (rafting ) ..

5-  ممر ساكليكنت المائي Saklikent Gorge ..

6-  قرية " كاياكوي" (Kayaköy) او المدينة المهجورة ..

7-  مدينة السلطان المائية "Sultan Aqua City" بفتحية ..

8-  حمامات كليوباترا .. 

9-  رحلة نهريه في نهر داليان .. 

10-  حمامات الطين التركي ونزول المياه الكبريتية ..

 

مدينة فتحية - تركيا

 

مدينة اسطنبول واهم المزارات و الانشطة بها واسعارها

1- جامع السلطان احمد وايا صوفيا 

2- البازار الكبير سوق مغطى 

3- قصر توبكابي ( بتاع حريم السلطان وفية كافية – حديقة جولهانة جنب القصر ) 

4- ميدان تقسيم وشارع الاستقلال به ( مطعم المدينة ومطعم نصرت و حافظ مصطفى وايس كريم و ملبن متحف الشمع وبرج جلاطة  )

5- بورصة بها ( اعلى تلفريك و حمامات كبريتية و المسجد العثماني والشجرة القديمة  )

6- منطقة مسجد أيوب ودي ( منطقة شعبية وقعده و تليفريك )

7- جزيرة الاميرات ممكن ( تركب الحنطور 75 ليرة – وتاكل فى مطعم على البحر )

8- منطقة الفاتح يوجد بها ( مسجد الفاتح – سوق الفاتح اسعار تبدا من 5 ليرة )

9- منطقة اسكودار بها ( قصر دلما و متحف الشوكلاتة و ملاهي أكوا مارينا واكو دولفين )

10- جزيرة الاميرات هتكلفك ( ١٥ ليرة عباره عن ١٠ ليرة لتأجير عجله تلف بيها او ممكن تأجر حنطور ، ١٠ ليرة طبق توت )

 

اسطنبول تركيا

 

مدينة بورصة : وهتشوف فيها أجمل المعالم السياحية

1- جبل الأولوداغ Uludağ وركوب التلفريك ..

2- الشجرة التاريخية الكبيرة ..

3- سوق قوزا هاني بزار Koza-Hani ..

4- المسجد الأخضر .. 

5- الجامع الكبير أو كما يطلق عليه الأتراك "أولو جامع" ..

6- الشلال الصغير أو ما يطلق عليه " شلال سعيد أباد" ..

7- الشلال الكبير ..

8- مغارة أويلات Oylat Caddesi ..

9- منتزه لونا بارك Luna park..

10- ﺣﺪيقة ﺳﻮﻛﺎي بارك. Sukay Park.

11- مجمع بوديوم بارك Podyum park..

12- شلالات سياتابات''Saitabat''

13- قرية إيسكيكار أغاتش "Eskikarağaç Köyü" ..

14- جنة سان ساراك الخفية ''Sansarak Kanyonu "..

 

جبال الاولداغ بورصة

 

برنامج سياحي في تركيا لمدة 6 ايام 

اليوم الاول : ( الاستمتاع بمنطقة السلطان احمد ورحلة البسفور واستكشاف مدينة اسطنبول )

(1) تنزل على منطقة السلطان احمد تبدأ بقصر توبكابي تجيب muze card ب ١٢٥ ليرة هيدخلك توبكابى مع حريم السلطان مع هاجيا ايرينى تخلص دول وتروح على هاجيا صوفيا وبعدها مسجد السلطان احمد 

(2) الساعة ٢ تتحرك بالترام على محطة ايمينونو تاخد المركب وتعمل (رحلة البسفور القصيرة ) ب ١٢.٥ ليره هتلف ساعتين فى البوسفور هتشوف كل الكبارى المشهورة وهتشوف مسجد أورتاكوي وهترجع الساعه ٤ ونص العصر

(3)  تمشى دقيقتين تلاقى بتوع سندوتشات السمك هتاكل سندوتش ب ١٠  ليرة بعدها ترجع على تقسيم تدخل متحف الشمع madame tussauds ب ٦٠ ليرة في شارع الاستقلال وتتصور مع تماثيل كل المشاهير اللى فى الدنيا بعدها تتمشى شويه فى شارع الاستقلال وتخش lc waikiki تجيب شويه هدوم

(4) بعدها تدلع نفسك وتركب مترو لحد محطة levent تنزل تتمشى ٥ دقايق وتوصل مطعم المدينه فرع اتيلير تروح تتعشى بس اقل وجبة بشخص واحد هتتكلف حوالي ٧٠ ليرة وتتصور مع الشيف اللى مجنن الناس czn burak لو ملكش فى الشيف ده يبقى خش مطعم المدينة فى شارع الاستقلال 

 

اسطنبول تركيا

 

اليوم الثانى : استكمال باقي مزارات اسطنبول الرائعه 

(1) تصحى بدرى برضو وتفطر بسرعه وتاخد مواصله على امينونو توصل بدرى على 9 ونص كده بالكتير هو المشوار من تقسيم اقل من ربع ساعة تشوف مواعيد البواخر اللى بتطلع جزيرة الاميرات تنزل اخر جزيرة هى الكبيرة والمهمة buyukada توصل هناك قبل الساعة 12 تتمشى شويه فى الجزيرة لو عاوز تأجر حنطور ماشى بس هو غالى وعليه طابور طويل 
أجر عجل ارخص وعامةً ما تطولش فى الجزيره خدلك حاجة تتحرك علي الساعة 3 توصلك 5 امينونو 

(2) تطلع على حديقة miniaturk ب 15 ليرة للفرد دى حديقة لطيفة فيها كل آثار تركيا على هيئة مجسمات دى بتقفل الساعة 7 حاول توصل قبل 6 وتلفها فى ساعة  

(3) بعدها تشغل الجى بى اس تانى وتطلع على تلفريك ايوب تطلعه وممكن تشرب حاجة على الكافيه اللى هناك بس بردو متقعدش كتير عشان لسه فيه جوله عاوز تكملها 

(4) تنزل تانى بالتلفريك وتركب أتوبيس وتغير لترام وتطلع على مول فينيسيا تلف فيه شويه وممكن تركب الجندول شبه بتاع فينيسيا في ايطاليا ب 30 ليره وتروح الساعة 10 عشان بيقفل وتكمل فى شارع الاستقلال لف لو انت ساكن هناك .. ده لو كنت لسه قادر تلف

 

اسطنبول تركيا


اليوم الثالث : جولة لأستكشاف اجمل معالم اسطنبول 

(1)  قبل الساعه ٩ تمشى فى شارع الاستقلال هتلاقى كنيسة سانت أنطون البدواني ممكن تزورها هى فى النص التانى من شارع الاستقلال وبعد كده تكمل مشي ١٠ دقايق برج جالاتا تتصور معاه من تحت

(2)  بعدها تطلعه فوق هو ب ٣٠ ليره وممكن تحجز السينما ال 5D ب ١٥ ليرة  يعنى كله كدة بحوالي ٤٥ ليرة هتلف فوق شويه وتشوف البوسفور والقرن الذهبى ونقطه تلاقيهم مع بعض واسطنبول كلها بعدها تنزل دورين على رجلك تخش السينما العرض بياخد ١٠ دقايق بيفرجك على كل معالم اسطنبول ودة حلو جدا 

(3) اتحرك على متحف Borusan Contemporary ده ب ١٠ ليرة فى منطقة bebek ده متحف لحاجات كده تعتبر فن حديث انوار واضاءه وحاجات حلوة  بس مش ده المهم فى المتحف المهم فيه انه ١٠ ادوار وبيبص على طول على الكوبرى التانى بتاع البوسفور والمنظر من الروف بتاع المتحف تحفه 

(4) بعدها ارجع كمل ساعة ولا ساعتين فى تقسيم والاستقلال وروح نام بس مش كتير عشان وراك سفر وفسحة اليوم الرابع من الرحلة.

 

اسطنبول تركيا


اليوم الرابع  : الذهاب الى مدينة بورصة والاستمتاع بأجمل الاوقات 

(1) هتحجز رحلة بورصة مع شركة هتكلفك حوالي  ١٣٠ ليرة بس ممكن تلاقيها ارخص من كده شويه ودي هتبقي شاملة الغداء والعبارة والمواصلات وركوب اطول تلفريك فى العالم الرحلة بتاخدك على مناحل العسل وبيت المربى ومصانع الحلقوم التركي (حاجة زى الملبن) بس عامة الحاجات دى مش رخيصه

(2) بعدها بتطلع على جبل اولوداغ وبتتغدا وتكمل لفوق بالاتوبيس وبتنزل بالتلفريك وبترجع اسطنبول على ١١ بالليل.

 

مدينة بورصة التركية


اليوم الخامس  : التوجه لعمل رحلة لــ  بحيرة صبنجة وغابات محموديه ومعشوقيه

(1) المتعه كلها فى المكان ده صبنجه ومحموديه ومعشوقيه ودى رحلة بحوالي ١٠٠ ليره ممكن تحجزها مع نفس الشركة وبتكون شاملة الغذاء والمواصلات

بياخدوك باتوبيس بتروح بحيرة صبنجه بتقعد عليها ساعه تتصور وممكن تاكل الفطير بتاعهم اللى اسمه جوزلامه محشى جبنه او سجق او الاتنين وبصراحه السجق فى تركيا مالوش حل

(2) بعد ما تخلص من بحيرة صبنجة بتروح على غابات محمودية ودي عبارة عن  شلالات وخضره وبتتغدى هناك وبعد كده بتروح معشوقيه بتلعب العاب زى البيتش باجى وبتطلع الجبل تبص على بحيره صبنجه من فوق

(3) وفي هناك لعبة ال zip line  الحبل اللى بتتشعلق فيه وتحس انك طاير ده ٤ حبال حبلين رايح وحبلين راجع ب٢٠ ليرة ولو هتلعب كذا مره ممكن تفاصل معاهم وبال ٢٠ ليره دى تاخدها مرتين يعنى بال٢٠ ليره تاخد الحبلين رايح وحبلين راجع مرتين 
وبترجع تانى اسطنبول على ٩ بالليل 

 

بحيرة صبنجة - تركيا

 

اليوم السادس  : زيارة متحف الشوكولاته Pelit Chocolate Museum 


(1) ودة يوم مخصص لجولة في مكان بعيد ساعة ونص بالاتوبيس بعدها 10 دقايق تاكسى ب 10 ليره
Pelit Chocolate Museum 

وده فى حته بعيده بس ماينفعش ما تروحوِش ، افتح الــ جى بى اس هيديك رقم الأتوبيس اللي هيوصلك لقريب من هناك هو بدورين وتقريبا ( 76D و  76E ) هما دول اللى بيروحوا هناك 

اول ما توصل هتاخد تاكسى هتلاقي نفسك فى عالم الشوكولاته سعر الدخول 30 ليرة وبيدوك بار شيكولاته مجانى 

والمتحف فيه كل اثار تركيا والشخصيات المشهورة و اثار من العالم معمولة من الشيكولاته
اول ما تدخل واحدة هتديك كبايه صغيره من الشيكولاته وتفتح حنفيه وتملاها لك شيكولاته سايحه وتقوم انت تشربها وتاكل الكبايه

 

متحف الشوكولاته - اسطنبول

 

في ابلكيشن لطيف جدا اسمه ترافي للطرق وعشان تعرف تروح منين لفين وتركب ايه والطريق هياخد قد ايه وقت
ومهم جداً أنك تحمل نسخة أوف لاين أسطنبول فى جوجل ماب عشان هيفيدك جداً


اهم برامج و Applications ممكن تستخدمها هناك هى Visit A City و Trip Advisor و دليل اسطنبولIstanbul Directory هتساعدك فى تنظيم الرحلة باليوم و مواعيد اللى المتاحف و القصور بتكون فاتحة فيها؛ و كمان اماكن المطاعم و الكافيهات و تروحها ازاى.