القرية الفرعونية 

كلنا تقريبا نسمع عن القرية الفرعونية اللى موجوده فى شارع البحر الأعظم لكن 90% من الناس مش عارفه ايه اللى موجود فيها بالتفصيل ولا حتى احنا لان كل شوية بيبقى فيها تطورات وبيعملوا حاجة  جديدة عشان كدا قررنا نعرف الناس على تفاصيل المكان الجميل جداً دا واللى مش واخد حقة تماما ..رغم أن كل اللى بيروح بيرجع مبسوط.. 


اولا لما بتدخل القرية الفرعونية بتركب مركب نيلية ومن هنا تبدأ الرحلة

( على فكرة القرية مساحتها شاسعة وصعب جدا تخلصها فى يوم واحد دى فيها 14 متحف )
المركب بتاخدك في جولة نيلية من خلالها بنمر على تماثيل فرعونية وبيبقى فيه سماعات فى المركب بتحكى قصص التماثيل دى عن طريق الصوت
وبتعرف ان فى آله اسمه بس عند الفراعنة زى ما قال عادل أمام بس مش بتاع المسخرة هتعرفوا قصتة بقى وانتوا فى المركب ..


وبعد كده بتخش على الجزء الأمتع وهو عملية محاكاة وتمثيل للحياه المصرى القديم

ودة بيكون عن طريق ممثلين بـ زى فرعونى بيمثلوا ازاى كانت حياة المصري القديم اليومية زى مثلاً ( الحرث ، والبذر ، الشادوف ، والاسواق، تصنيع الفخار والعجلات الحربية والعسل ، الخ ) وكل تفصيله صغيره او كبيره بتخص حياه الفراعنه طبعاً انت بتشوف كل ده وفى شرح لكل حاجه صوتياً بتسمعه فى المركب ..


وبمجرد ما بتخلص الجولة النيلية بتنزل ويبتدى الجزء الشيق جداً فى المكان وهى جولة سياحية

بتدخل مبنى كبير على شكل معبد و بيكون معاك فيها مرشد بيشرحلك كل حاجه عن المجسمات اللى هناك كأنك فى الاقصر او اسوان بالظبط بيبقى موجود مجسمات لمعابد وللبيوت اللى كانوا بيعيشوا فيها المصريين القدماء وبعد ما تاخد الجولة بتريح شويه فى مكان زى جنينه كبيره موجود فيها كافتيريا وكمان حديقة حيوان جميله جداً ومسليه للأطفال والكبار بيكون ليها رسم دخول ب ١٥ جنيه وبعد ما تستريح بتدخل مكان مغلق عبارة عن سوق شامل مليان بازارات ومحلات بتبيع تذكارات وهدايا وعطور وتقدر هناك تكتب على الازاز وكل الحاجات دى متوفرة بأسعار مناسبة وبعد كده بندخل مقبره توت عنخ امون اللى عبارة عن محاكاة للمقبره اللى موجودة فى المتحف وبتسمع الشرح من مرشدين متميزين ومحترفين جداً وعلى فكره متوفر هناك فى القريه ملاهى للأطفال كويسه جداً وكمان art center يقدروا يرسموا ويلونوا فيه 


بعد ما بتخلص الجوله مع المرشد  تبتدى تتوجه للمتاحف .

فى هناك حوالى ١٤ متحف متنوعين على سبيل المثال متحف التحنيط والمتحف الاسلامى والمتحف القبطي ومتحف المراكب ومنحف ناصر ومتحف السادات ومتحف تاريخ مصر الحديثه ومتحف المراكب والسيارات الكلاسيكية ومتحف كليوباترا ومتحف النوبة ،الخ 
وبيكون متوفر فى كل المتاحف دى صور وتماثيل بتدعم وبتشرح الحقبة التاريخية لكل متحف وكمان بيبقى فى مرشد سياحى فى كل متحف بيشرحلك محتوياته 
المكان متوفر فيه حمامات نظيفه وصالحه للاستخدام وكمان parking للعربيات 
فى هناك يخت تقدر تركبه وتاخد جوله ب ٤٥ جنيه للفرد 
المكان هناك مليان بالسياح وخصوصاً السياح العرب  

نيجى بقى للأسعار

فى عروض كويسه جداً بتبقى افضل من سعر التذكره الفردى زى عرض الأسره اللى بيكون ب 185جنيه يشمل (اب وام وطفلين اقل من عشر سنوات ) 
وفى كمان package للأطفال يقدر الطفل انه يدخل (art center وحديقه الحيوان و٣ لعب فى الملاهى ) ب٥٠ جنيه بس 
اما بالنسبه لأسعار التذاكر الفرديه للمصرين فمتوفر كذا برنامج 
١-جوله القريه ومقبره توت عنخ امون ب ٨٥ جنيه 
٢- القريه والمقبره + ٣ متاحف ب ١٢٥ 
٣- القريه والمقبره + ٣ متاحف + يخت ب ١٦٠ 
٤-القريه والمقبره +٣ متاحف + يخت + غذاء ب٢٣٠ 
اما بالنسبه لأسعار السياح العرب فهتلاقيها موجوده فى الصور دى

القرية الفرعونية

 

القرية الفرعونية

المكان كبير جدا وجميل جداً ويضاف لقائمه الاماكن اللى مش واخدة حقها فى مصر 
جوله سياحيه ونيليه لجميع افراد الاسره وللشباب وحتى لو معاك اطفال هيقدروا يتبسطوا هناك بالملاهى وحديقه الحيوان وال art center وكمان يعرفوا تاريخ بلدهم 
إدارة المكان هناك ممتازه ومحترفه جداً وبتهتم بكل التفاصيل وهتخسوا بالكلام ده لما تروحوا هناك 
المكان بيفتح من ٩ ل ٥ 
واعملوا حسابكوا ان الجوله هناك بتطول شويه يعنى لما تروح هناك اعمل حسابك تقضى يوم كامل
العنوان : 3 شارع البحر الأعظم -- الجيزة 
التليفون للأستفسارات : 0235718675 

 

 

القرية الفرعونية

 

المصادر : صفحة افضل اماكن الفسحه والخروج فى مصر