كوكب اليابان
مبدئيا اليابان كوكب فعلا ملهوش اي علاقة بالارض الشعب الياباني قمة في الاحترام بين شعوب العالم احترام وذوق و نظام ونظافة وتعقيم غير عادي. الشعب الياباني بيتعلم الاحترام من الصغر وبيتعلموا ازاي يحافظوا علي بلادهم وضيوفهم.

ودول معلومتين كدة عن اليابان قبل ما ندخل في موضوع المقال : 

-في اليابان ممنوع تدخن سجاير في اي مكان الا اوضة ازاز مغلقة في الشارع وتنقي الهواء اللي خارج

-العربيات في اليابان اغلبها كهرباء والاتوبيسات بتشحن لوحدها بمجرد ما بتقف في المحطات او الاشارات.
 
هنحاول نقسم المقال لكذا جزء ونتكلم معاكم عن كل المعلومات التفصيلية اللي تخص السفر والسياحة في اليابان

 

اليابان

 

اولاً : تأشيرة اليابان للمصريين 

من لحظة دخولك السفارة وانت هتحس انك انفصلت عن الأرض. احترام غير عادي من موظفين السفارة بتروح من غير ميعاد بس في مواعيدهم اللي شغالين فيها 

فيزا اليابان من اسهل واسرع التأشيرات لو ظبطت ورقك كويس  كل الموظفين فى السفارة فى منتهى اللطف والرقي والمكان مريح لدرجة تشوقك للبلد من قبل ما تسافر .

الاوراق المطلوبة للحصول علي فيزا اليابان  :-

 - أملآ و اطبع استمارة السفارة الموجودة على موقع السفارة دة
http://www.eg.emb-japan.go.jp/e/visa/1.htm

- صورتين 4*6

- حجز فندق مش شرط يكون مدفوع 

- تذكرة طيران 

- كشف حساب بنكى مش شرط مبلغ كبير 

- جواب HR  من جهة العمل

- جدول بسيط لخطتك فى اليابان او هتروح فين كل يوم وهنزلك صورة لجدول ممكن تعمل زيه 

- جواز السفر واى جوازات سابقة

- بتروح من غير تحديد ميعاد للسفارة على كورنيش المعادى ( 81 شارع كورنيش المعادى ) من الاحد للخميس من الساعة 9 صباحا الى الساعة 2 

بتدخل على طول لموظفة لطيفة تسالك عن سبب الزيارة و تراجع الورق وتسلمك إيصال ب 480 جنيه هتدفعهم عند استلام الفيزا فقط ومش هتدفع حاجة لو مفيش نصيب .

الاستلام بعد 4 ايام عمل . الفيزا مدتها 3 شهور تبداء من تاريخ الاصدار - إقامة 15 يوم 
 

جدول سياحي فى اليابان

جدول رحلات يومي في اليابان يتم طلبه ضمن الاوراق الخاصة بالتأشيرة 

 

ثانياً  : تذاكر الطيران من القاهرة - طوكيو واسعارها 

السفر من مصر للطيران مباشر بين القاهرة وطوكيو بدون ترانزيت  ( مطار ناريتا الدولي ) رحلة أسبوعية كل يوم سبت من القاهرة والعودة من طوكيو كل يوم أحد يعنى كدة كدة أقل مدة تقدر تقعدها هناك اسبوع

ومتوسط سعر تذكرة الطيران لطوكيو يتراوح ما بين 11000 : 17000 وكل ما تحجز بدري كل ما السعر يكون ارخص 

-الوصول لمطار ناريتا  ، الطائرة بتوصل تقريبا الساعة 8 مساء بتوقيت اليابان 
ضابط الجوازات هيسألك كام سؤال زى جاي تعمل ايه؟  وفين تذكرة الطيران العودة ؟ وحجز الفندق والوظيفة وبعدين يختم لك بالدخول

ثالثا : تغير العملة 

 ممكن تغير عملة من المطار وال 100 ين ياباني تقريبا بـــ 16 جنية طبعا بتغير دولار لأن الجنية غير معترف بية هناك .
 

رابعا : بالنسبة للإنترنت في اليابان

ممكن قبل ما تسافر تحجز جهاز portable wifi وتستلمه من مكتب فى المطار وده انسب حل  لو مسافر مع مجموعة لانة بيقدر يوصل wifi لغاية 10 أجهزة فى وقت واحد تكلفة ال 8 ايام كانت فى حدود 1000 جنية يعنى الفرد فى حدود 330 جنية ومعاك 3 جيجا استهلاك يومي طبعا خطوط الداتا متاحة وارخص ولكن هتبقى لجهاز واحد فقط.

خامسا : كم يبعد مطار ناريتا عن طوكيو ؟

مطار ناريتا يبعد عن طوكيو حوالى ساعة ونصف بالقطر. وهناك هتلاقي اكتر من فئة قطار للوصول لطوكيو وطبعا كل ما قل الوقت زاد السعر بس عموما ممكن تختار قطر لطوكيو يوصل  فى 70 دقيقة تقريبا تكلفتة 180 جنية مصري
 

سادساً : بالنسبة للإقامة في اليابان واسعارها 

الإقامة هناك ممكن الاسبوع يكلفك من  2500 : 4000 جنية مصري للفرد

وبنرشحلك  space hostel Tokyo ودة هوستيل كويس جدا لا ينقصه شئ ويبعد عن محطة Ueno ( إحدى المحطات الرئيسة فى طوكيو ) بتاعت المترو حوالي 10 دقائق مشي والمنطقة مش سياحة بس رخيصة
 

سابعاً : بالنسبة للانتقالات في اليابان

الانتقالات اسهل وأعظم حاجة هو المترو والقطارات لان ليهم شبكة رهيبة تربط جميع الأماكن ببعضها  ( بعض الشركات المشهورة هناك JR - Tokyo metro )

ارخص وسيلة هي الاشتراكات وهناك هما بيشجعوا السياحة عن طريق جواز السفر وتأشيرة السياحة تقدر تحصل على اشتراكات يومية أو 3 ايام او أسبوعية ويوجد اختيارات كثيرة جدا وايضا موفرة جدا ودة للسياح فقط وليست لأهل البلد

-تذكرة يومية خاصة بطوكيو تشمل جميع وسائل المواصلات لعدد لا نهائى من المرات تكلفتها تقريبا 260 جنية

وممكن تشتري تذكرة لمدة 3 ايام لطوكيو وبعض المدن القريبة عدد لا نهائى من المرات ودي هتبقي مفيدة جدا هتقدر تلف بيها اماكن كتيرة جدا اسمها Tokyo wide pass ودية تكلفتها تقريبا 1500 جنية
 

ثامناً : بالنسبة للاكل 

طبعا الأكل غالى لو هتقارنة بالنسبة للجنية المصري ولكن طبعا فيه طرق الاكل الرخيص وكانت الوجبات السريعة الموجودة فى المحلات زي 7eleven ودية منتشرة هناك فى كل مكان ودية وجبات سريعة تحضر فى خلال دقائق عن طريق الميكروويف داخل المحل وتكلفتها فى حدود 80 الى 150 جنية

-  بالنسبة للشرب ماء الحنفيات على مستوى طوكيو صالح للشرب مفيش فيها مشكلة

وكمان يوجد vending machines ممكن تجيب منها مشروبات أو اكل منتشرة بكثرة جدا فى الشوارع وجميع الاماكن 

 

واخيرا دة مقال يخص : برنامج سياحي رائع لزيارة اجمل معالم مدينة طوكيو لمدة 7 ايام 

 

اليابان