عشان سلامتك تهمنا.. بنقدملك نصائح هامة لزوار سانت كاترين فى موسم الثلوج ..

بخصوص حلول الشتاء وموسم الثلوج على محمية سانت كاترين وال بتكثر فيه الرحلات ... نحب نقدملكو شوية نصائح كدا بخصوص الرحلات دى علشان لو طلعتو مع اى جروب او شركه سياحية تتاكدو منها قبل ما تحجزو ولو فكرت وقررت تسافر رحلة سريعه لسانت كاترين ممكن تشوف الرحلة دى بأسعار مش هتصدقها : 

سافر على دهب وسانت كاترين فى الويك اند عالسلريع ب 350 جنيه وبس 

اولا : اوعى تفتكر ان انت رايح لجو مختلف وثلج وكدا انه حاجة بقى ممتعه وعادية وان المشى فى الثلج دا امر بسيط وعادى ..

لا الموضوع مش سهل ولا بسيط ومتصدقش اى حد يقولك عادى ولا يبسط لك الموضوع لازم قبل ما تطلع تبقى عارف ان الامر صعب وربما يبقى خطير كمان . عارف ليه ؟؟ لان الثلج دا مش بيبقى مفتت زى ما انت متخيله دا انت بتطلع على 870 درجة سلم حجرية متغطية بطبقة من الثلوج متماسكة وناعمة كالزجاج .. يعنى دا مش تلج من ال بيتلعب بيه دا تلج زى الازاز وبيزحلق جدا جدا وتخيل بقى انك بتطلع وتنزل بالساعات ومافيش حتى سور او حبل تمسك او تسند عليه واى غلطة لا قدر الله تؤدى ال ابسط شيئ كسر دا فى حاله ان ربنا يستر وكمان الغلطة مؤذية لك وللى حواليك من الناس ال بتطلع وتنزل لان هو طريق واحد وبيكون مزدحم .

ثانيا : الجروب ولا الشركة اللى هتحجز معاهم دول لازم تتاكد انهم خبرة فى مثل هذه الرحلات

ولازم كمان تتاكد انهم بيطلعوها باستمرار ميكونش مجموعة هواه وخلاص وتتاكد ان مع الجروب بتاعك اكتر من مشرف واكتر من دليل من البدو على الاقل واحد فى اول المجموعة وواحد في آخرها .

ثالثا : لما تطلع متفكرش تسيب مجموعتك وتمشى لوحدك

خليك متمسك بمجموعتك من اول لحظة لآخر لحظة ولعلمك هناك الجبال والوديان شبيهه لبعضها ولذلك لا قدر الله فى حالة الفقدان مافيش عودة لا قدر الله .

رابعا : انت لما تبص للجبل من تحت قبل ما تطلع هتفتكر ان الموضوع سهل وبسيط وهيعدى بسرعة

لكن انت هاتخد فى الطلوع مش اقل من 3 ساعات متواصله عشان توصل للقمة ودا طبعا بيكون بدايه من الساعه 12 بعد منتصف الليل .

خامسا : وفر مجهودك وطاقتك على اد ما تقدر

يعني متحاولش تعمل وقت الطلوع اى شيئ يجهدك لكن محتاج لكل طاقة وانت فوق . وخلى بالك طول فترة الطلوع متحاولش تريح ولا تقعد اكتر من 5 دقائق لكن كل ما ريحت اكتر كل ما هتتعب اكتر فحاول تحافظ على جسمك سخن .

سادسا : مهما كان الجو ثلج هتعرق جدا وتحس انك سخن جدا

ودا طبيعى جدا لانك بتبذل مجهود وبالتالى وانت فى البداية قلل لبسك على اد ما تقدر وكل ما هتطلع اكتر كل ما الجو هيبقى برد اكتر واكتر فهتبقى عاوز تلبس حاجات تانى فوق لبسك يبقى ابدء بالخفيف لان فوق هيبقى تلج جداااا .

سابعا : لو عندك اى امراض

سواء ضغط ولا القلب ولا حساسية على الصدر ولا اى امراض وحاسس انك هتتعب متطلعش لان فوق مافيش منقذ غير ربك يعنى لا فى فوق وسيلة نزول سريعة تنجدك ولا فى عيادة ولا دكتور هيكشف عليك ولا يلحقك وعشان تنزل مفيش حد هيقدر يبقى معاك .

ثامنا ودا مهم جدا :

طول اليوم قبل الطلوع متقلش فى الاكل لان طبعا مفيش حمام بس انصحك انك تكل بلح كتير اوى وموز وخدهم معاك في الشنطة وانت طالع وكمان شيكولاتة .. وطول ما انت طالع كل بلحة او خد بوق عصير او حتة شيكولاته لان الحاجات دى بتديك طاقة .. كمان خد معاك 3 حاجات مهمين جدا اولا كشاف عشان الطريق .. ثانيا اى حاجة حادقة زى المخلل او شيبسى بالملح مثلا او جبنة قديمة .. عشان طبيعى حالات الاغماء فى الطريق وان الضغط ينزل وبالتالى هتحتاج للموالح .. ثالثا ودا مهم كيس ملح ودا بقى بالذات لازم فى حالة وجود ثلج لانه هترش طول ما انت طالع على السلالم ملح على المناطق ال فيها ثلج عشان يقلل من التزلج ميخلكش تتزحلق بسبب الثلوج .

الكلام دا كلام مبدئى كدا لازم تبقى عارفه قبل ما تطلع جبل موسى فى محمية سانت كاترين .. وخد بالك لو حد معاك قالك تعالى كدا بيقولو فى جبل هنا حلو ولا نروح نتصور فى المكان الفلانى ولا نريح هنا شوية .. خد باااااالك المزار فى محمية سانت كاترين هو جبل موسى دير سانت كاترين ودول طريقهم محدد وواضح متحاولش تغامر بحياتك .وافتكر (( انت طالع تستمتع وتنبسط مش تضحى بحياتك )) .. 

الحاجات ال فى الصورة دى مهمة جدا ولازم تكون معاك وانت طالع 

 

المصدر : صفحة بلدنا احلى بينا

سانت كاترين