أليك معلومات تفصيلية بأسعار كل شئ يخص سفريتك الي جورجيا واهم المعالم التي يمكنك زيارتها بها

جورجيا تعتبر وجهة مميزة للسياحة لما تمتاز به من عوامل طبيعية من حيث المناخ الرائع والطبيعة الخلابة والموقع المتميز دة غير ان جورجيا دلوقتى تعتبر من البلاد اللي معتمدة على السياحة ومصاريفها متوسطة 
 
وهنتكلم في مقالنا دة عن كل حاجة هتقابلك في جورجيا من اول ما هتفكر تروح هناك لغاية ما توصل جورجيا :

هنعرفك بالفيزا إجراءاتها وتكلفتها - وتذاكر الطيران ومتوسط اسعارها -  العملة في جورجيا - والمواصلات والاكل وكمان هنرشحلكم فنادق واماكن اقامه ممتازة عن تجربة - واخيرا هنتكلم عن اهم المزارات والاماكن اللى تقدر تزورها في العاصمة تبليسي وما

حولها واهم الانشطة اللي تقدر تعملها فى تركيا .. 
 

اولا  فيزا جورجيا : 

فيزا جورجيا الالكترونية ( اون لاين ) بتكون بــ 20 $ (ملحوظة مهمة : جورجيا دلوقتى بقت فيزا وتصريح أمنى من مصر ) إلا إذا كنت طالع لها من برة مصر هتدخل بفيزا اونلاين عادى . ولو عاوز تعرف اكتر عن فيزا جورجيا ممكن ترجع للمقال دة فيه كل

التفاصيل اللي هتحتاجها :  كيفية الحصول علي فيزا جورجيا من السفارة وفيزا جورجيا الالكترونية
 

 
ثانيا تذاكر الطيران الي جورجيا :

 فى شركتين بتروح عليهم لجورجيا

- العربية للطيران مصاريف ذهاب وعودة فى حدود 8000 او 9000 ج بتركب من مطار القاهرة الدولى مدة الرحلة ٣ساعات ونصف بتنزل ترانزيت في الشارقة حسب الترانزيت اللي انت حاجزه ( فىه ترانزيت  ساعتين وفي  ٥ ساعات على حسب ما تحب انت )  وبعد كدا من الشارقة لمطار تبليسي (جورجيا) 

- تانى طيران اير كايرو,,  ايرو كايرو حلو جداً الرحلة من مطار الغردقة او شرم الشيخ وطيران مباشر بدون ترانزيت بالضبط  ٣ ساعات ونصف هتكون في تبليسي وصلت بالسلامة

** ارخص تذكرة طيران لجورجيا "تبليسي العاصمة " بتطلع من aircairo من الغردقة سبت و اربع او احد و اربع من شرم الشيخ الرحلة بتبقي direct من غير ترانزيتزي ما قولنا 

- وفي من مطار القاهرة عادي بس فرق السعر الضعف مثلا و كمان فيها ترانزيت ٥ او ٦ ساعات .

ثالثا عملة جورجيا : 

العملة عندهم اسمها اللاري واللاري الجورجي  ب ٧ جنيه مصري

واول حاجة تعملها اول ما توصل المطار غير ١٠٠ دولار بحوالي  (٢٤٥ لاري) واشتري خط ونت هيكلفك حوالي  ٦٠ لاري

رابعا المواصلات في جورجيا :

-لما تخرج من المطار حابب تركب تاكس او bus التاكس اخره ياخد ٢٠ لارى مش اكتر من كدا ، لو انت عاوز توفر اركب bus 37 ب نص لارى هينزلك فى نص البلد وبيمشى في البلد نفسها انت شوف الاوتيل اللي نازل فى وخليك متابع مع Google Maps 
- المترو هو وسيلة المواصلات المناسبة لو هتتحرك كتير فى العاصمة تبليسي ، هتشترى كارت المترو فى حدود 3 لارى الكارت وانت اشحن مثلاً ب 10 لارى الدخول المرة الواحدة ب نصف لارى فيه ميزة حلوة خلال الساعة تدخل وتطلع بنصف لارى اللي دخلت بيها أول مرة بعد الساعة بيبدأ يسحب نصف لارى جديد. 

-  اي مكان عاوزين تروحوه اكتبوه علي ال google map و اختاروا تروحوا ازاي لو بالاتوبيس هو هيكتبلك ارقام الاتوبيسات اللي بتروح هناك.

خامسا الاكل والمطاعم في جورجيا :

البلد دي بتعشق المعجنات  في كل حتة في مخبز و بيعملوا معجنات حلوة اوي ،

-فى منطقة اسمها Marjanishvili دى منطقة سياحية كلها مطاعم عربية وحلال ،بعد كدا عندك المطاعم الجورجية فى عندك بقا اكلة الخنكالى والختشابورى وكباب واكل تانى كتير بس دا الطبق الرئيسى بتاعهم وعمتا لازم تجرب تاكل اكل جورجى

- في هناك كارفور في كل حتة و حاجته جميلة اوي ممكن تشتروا من هناك اي حاجة .

-الفاكهة و الخضار هناك طعمهم حلو بشكل مش طبيعي و دي لانهم مش بيزرعوا بمبيدات خالص و المطر و الخضرة هناك معظم السنة 

سادسا الإقامة في جورجيا :

لو عاوز تسكن في فنادق ومحتاج حاجة مستوي عالي شويه من الهوستيل بنرشحلك فندقين عن تجربه هما : 

1. Old Tiflis Boutique Hotel 4 stars

2.  Aivani Old Tbilisi 5 stars

الحلو في الفندقين دول و أي فندق حواليهم انهم في الوسط و فيه كل حاجة تتمنوها و دوريات الشرطة في كل حتة تحسوا بالأمان

وفي اختيار تاني هو موقع او ابليكشن airbnb تقدر تحجز من خلاله شقه وهنرشحلك شقه بحوالي 30 دولار في الليله بس نضيفه جدا وفي اقل من كدا كمان بس انت ممكن تختار اللي يناسبك  : https://bit.ly/2yOnBLk

سابعا : مناطق للسياحة في جورجيا و انحاء تبليسي:

1. Mtatsminda park 

 المكان ده حكاية بتطلعوا بتاكسي بـــ  15-20 لاري هو على جبل الدخول ببلاش عامل زي المدينة الترفيهية بس على جبال مرتفعة .. أمان ومناسب لكل الأعمار فيه انشطة تناسب كل الاعمار والتصوير على طولها حلو جدا ، يفضل زيارتها في الصيف فيها مطاعم و ميني ماركتس و اخرها في باص ينزلكم تحت ب 2 لاري للفرد و وانتم نازلين المنظر حلو اوي حاولوا تقعدوا في أول الباص تكشفوا الواجهة كلها. 
عند محطة الباص في مطعم تقعدوا فيه شايفين البلد كلها تحتكم. أما تنزلوا ممكن تاخدوا تاكسي ب 10 لاري للفندق

2. Old Mtskheta

ودي  منطقة فيها اسواق ومحلات وكنائس أثرية وموقع حلو اوي لهاوين التصوير و في حنطور بس مانعرفش سعره

3. Gudauri mountain for ice skiin

 نشاط شتوي يبدأ من أكتوبر لأخر مارس الطريق نفسه حلو جدا للتصوير وكل متر بتطلعوا ابرد من اللي قبله فيه تيليفريك رايح جاي ب 20 لاري بس لازم تجهزوا نفسكم للتلج مش اي حذاء مناسب ولا اي لبس مناسب ،  يناسب لكل الاعمار و فيه دروس تعليم التزلج ،  المكان على بعد ساعتين ونص من تبليسي

4. Jvari monastery 

 جبل عليه كنيسة اثرية التصوير من هناك يستاهل الواحد يروحله  ،  الطريق بياخد اقل من نص ساعة من تبليسي

5. Bridge of peace 

 قلب تبليسي فوق النهر بتاعهم التصوير من عليه حلو اوي و ساعات في المواسم تلاقوا عازفين جيتار وفرق بتغني ومن عنده ممكن رحلة نهرية ب 20 لاري للفرد لمدة نصف ساعة 

6. Freedom square  

فيه تمثال الحرية ونافورة تستحق الزيارة الشارع ده مليان محلات و فيه دانكن دونتس و مطعم مادو التركي غير محل بيربيري .. حلاوته ان فيه فري واي فاي للكل والتصوير فيه خلاب

7. Kartlis Deda 

 ودي مناظر طبيعية بتطلعوها بتلفريك ب 6 لاري للفرد طالع ونازل موقع تحفة للتصوير مناسب لكل الأعمار .. فيه zipper بتركبوا ينزلكم تحت وتبقوا نازلين وتحتكم اشجار كتير محتاج حس المغامرة وشجاعة .. ممكن تحجزوا طالع بس بالتلفريك وتنزلوا مشي على سلم مش على الجبال بس بتشوفوا البلد كلها تحتكم جبال و بيوت و تمثال أم الجورجيين .. تمثال يعبر عن استضافة الضيف بطبق الخمر الجورجي المشهور بالايد الشمال والايد اليمين فيها سيف تستقبل بها الأعداء

8. Borjomi Park 
 

ودي بارك فيها انشطة تناسب كل الأعمار ومناظر خلابة الدخول ب 2 لاري للفرد بتوصلوا للآخر لشلال التصوير عنده حلو جدا ومريح للاعصاب كمان فيه ينابيع مياه واحدة بيشربها للشفاء من الأمراض طعمه مملح شوية في أول البارك والتانية طعمها حلو اوي بيهدي الأعصاب  المكان بعيد شوية عن المركز حدود ساعتين بس يستاهل الرحلة 

بالنسبة للانشطة اللي ممكن تعملها في جورجيا : 

الــ activities اللي ممكن تتعمل هناك فيه zipline و ده بحوالي ٣٠ لاري للفرد و الـــ rafting ب ٥٠ لاري و الـــ  paragliding ب ٢٠٠ لاري و دي اغلي حاجة هناك 

وفيه مكان اسمه ginoparadise دي اكوا بارك هناك تحفة جدا  بس لازم لها swimwear معين ما يناسبش المحجبات
لن في جنبها  زي شاطئ خاص على Tbilisi sea كويس