سريلانكا بلد المغامرات ووجهة مهمه لعشاق الطبيعية ولأي حد بيدور عن اماكن سياحية جديدة للسفر حول العالم ، وتعتبر سريلانكا من اهم وجهات السياحة العالمية لغناها بالمناطق الطبيعية الساحرة اللي مازالت محافظة على رونقها وجمالها .
والمقال ده للناس اللى بتسافر بفلوس قليله وعايزة تنبسط وهنقسم المقال لكذا جزء هنعرفك فيه كل شئ عن سريلانكا وكمان هنعملك برنامج سياحي يساعدك تلف كل مدن سريلانكا
1- الفيزا
2- حجز الطيران
3- عملة سريلانكا ( الروبية)
4- الاقامة
5- الشوبينج
6 -المواصلات
6- الخروجات او برنامج سياحي لمدن سريلانكا
-------------------
اولا : سعر الفيزا لسريلانكا وكيفية الحصول عليها ( اون لاين )
بتقدم عليها وتجيلك بسهوله جدا تكلفتها 35 دولار بتطبعها وتقدمها هناك فى الجوازات وبيحطولك ختم و ستيكر ع الباسبور ، و هتدفع بالفيزا ف تخلي فيها ما يعادل 40 دولار عشان ميحصلش مشكلة ف الدفع ، وممكن تروح للسفارة بتاعتها فى الزمالك 8 شارع سريلانكا وتاخدها على الباسبور وسعرها 620 جنية للفرد و بتاخدها بعد يوم او اتنين بالكتير ومضمونة واللى تقدر تساعدك فى اى حاجة الاستاذة جهاد مسئول القسم السياحي بالسفارة Jiji Hashem
ثانيا : سعر تذكرة الطيران الى سريلانكا
لو حجزت قبلها بفترة كويسه هيكلفك فى حدود 7500 جنيه للفرد وده اغلي حاجة هتدفعها فى الرحلة ، ممكن تحجز علي طيران الخليج وترانزيت البحرين
ثالثاً : عملة سريلانكا هي الروبية السريلانكيه
سعر الدولار مقابل الروبية حوالي 170 روبية سريلانكي ودة معناه ان الاسعار هناك تقريباً ببلاش او رخيصة جدا .
رابعاً : الإقامة في سريلانكا وتكاليفها
حاول تخلي البرنامج بتاعك يكون كل يوم فى مدينة مختلفة عشان تستمتع بكل شبر في سريلانكا تقدر تحجز الفندق او الهوستيل من مواقع حجز الفنادق زي بوكينج وغيره ..
اسعار الفنادق في سريلانكا رخيصة يعني لو قعدت 6 ايام كل يوم فى فندق او هوستيل مختلف ممكن التكلفة كلها تكون 120 دولار تدفعهم بعملتهم .
واسعار الهوستيل ممكن يبقي ب 10 دولار او ب 12 دولار مثلا بالافطار لفردين وهكذا باقى المدن
ملحوظة : فلتر البحث بحيث يكون الهوستيل قريب من ال bus station عشان متضرش تاخد توكتوك للموقف رايح جاي وتوفر فلوس
ودول اشهر مدن سريلانكا اللي لازم تزورهم في رحلتك ( سيجريا - دامبولا - كاندي - بانوالا - نوراليا - ايلا - بنتوته - جال - كلومبو )
خامساً : الشوبينج في سريلانكا
الشوبينج هناك حلو فى مدينة كاندي لبس حلو وفى كذا مول واسعارها زى مصر وأقل شويتين
مدينة نوراليا فيها اللبس الشتوى لان دى اكتر بلد جوها بارد جدا ومطرة تقريبا على طول
وطبعا لا ننسى الشاى السريلانكي العظيم ممكن تجيبو من مصنع الشاي اللي في نوراليا اسمه Darmo Tea
الــ sea food في جال طبعا واوعي تنسي تجرب ال crab
سادساً : المواصلات في سريلانكا
المواصلات بين المدن سهلة كل مدينة فيها محطة باص او قطر ، بيكون فيها باصات لكل مدن البلد وانت تختار وجهتك تحجز وتركب في ساعتها والباص بيطلع كل ساعه تقريبا
كل تذاكر الباصات هناك بتتراوح ما بين 80 روبية ل 300 روبية للمدن وبعضها
سابعاً : الخروجات في سريلانكا
انت مش هتزهق من اللون الاخضر الشجر والزرع والجبال اللى مليانة خضرا فى كل مكان حواليك
وعلشان نكلمك عن الخروجات في سريلانكا هنديلك برنامج تفصيلي لزيارة مدن سريلانكا وممكن تعمل ايه في كل مدينة من اول ما تخرج من المطار
برنامج سياحي لمدن سريلانكا لمدة 6 ايام
اليوم الاول : مدينة سيجيريا
- اول ما توصل المطار ممكن تتحرك علي مدينة سيجيريا الطريق ليها بياخد حوالي 4 ساعات بتتفرج على مناظر مش طبيعية
- اول ما توصل تتجه مباشرةً على صخرة سيجريا بس غالبا هتكون غاليه فممكن تروح على الصخرة اللى ادامها اسمها Didorangala rock هتكون بحوالي 500 روبية للفرد وبتطلع تشوف مناظر جميلة وتلاقى الصخرة الكبيرة ادامك وبتقابل قرود وانت فى الطريق عادي خالص
- ممكن تزور كذا حديقة بعدها جميلة جدا فى الطريق .
اليوم التانى : ممكن تروح مدينة اسمها كاندي
- فيه هناك متحف المجوهرات ده مكان بيتم فيه تصنيع أغلى الأحجار الكريمة بعد ما تخلص جولتك
- وفى الطريق ممكن تروح Pinnawala ودى منطقة الأفيال وممكن تجرب تركب فيل ، احساس مختلف وانت ماشي فى الطريق تلاقي جنبك افيال عادي ماشية
- بعدها ممكن تروح بحيرة Kandy lake الجو هناك بيكون تحفة وممكن تأجر مركب هناك بيقعد حوالى نص ساعة بحوالي 2500 روبية
- وفي كمان معابد فى المنطقة دي تقدر تشوف كذا معبد لبودا وهندوس
-اخر اليوم بليل قضيه في عمل شوبينج فى مول فى مدينة كاندي وتسهر لان البلد هناك مش بيناموا بدري زي باقى المدن
اليوم التالت : زيارة مدينة نوراليا
- الصبح هتتحرك لمدينة نوراليا وهتشوف السحاب ادمك وجنبك هتحس انه عامل زي غزل البنات قريب منك جدا دا غير الجو الساقع والمناظر الطبيعية الرائعه اللى هناك
- فيه هناك كذا شلال حلوين جدا زي : lovers leap waterfall و Nana oya وكمان Gregory Lake ممكن تركب هناك Jetski
- لو عاوز تتفرج ازاى بيعملوا الشاى او تشترى شاى فيه هناك مصنع الشاي tea factory بيعزموك على شاي ببلاش وتاكل كيك طعمه حلو جدا
- فى طريقك ممكن تروح مكان اسمه Post Office ودا حاجة قديمة جدا جدا بس منظرة حلو اوووى
- بليل تقدر تعمل شوبينج.
اليوم الرابع : جولة في مدينة ايلا
-المدينة اللي بعدها هي ايلا مدينة حلوة اووي وجوها قريب من مدينة نوراليا بس ادفى شوية بس طول اليوم الجو بيمطر بس بيكون دافي
-اول حاجة تروحها هناك Little Adams Peak ودة زي جبل لكن طلوعه حلو جدا ولما توصل للقمة هتحس انك عملت انجاز والوقت من حلاوته بيجرى فوق
- هتنزل وتروح لأهم معالم المدينة وهو Nine Arch Bridge
- هتروح بعد كدا شلال هناك اسمه Ravana Fallas حلو اووي
- وبالليل ممكن تنزل تتفرج على البلد المدينة سياحية واسعارها غالية شوية فى الكافيهات لكن غير كده رخيص
اليوم الخامس : وصول مدينة بنتوته
-المدينة اللى بعد كدة هي مدينة بنتوته مدينة الدلع والانتخة والاستجمام
-البحر هناك حلو اووي ممكن تعمل Parachute وتطير حوالين المدينة 20 دقيقة عشان تريح اعصابك
- لازم تجرب هناك السي فود والسمك هناك طعمهم وهم
اليوم السادس والاخير : زيارة لمدينة جال
-آخر يوم هتروح مدينة Galle اكتر بلد فيها مسلمين ومسيحيين وفيها جوامع وكنائس والقلعة والبحر مدينة أثرية اكتر هتتفرج فيها على معالم حلوة
-اتمشي لل جال فورت ودي قلعة قديمة عشان تشوف الغروب هناك و تشوف الساعة اللي بقالها سنين ولسه شغاله بالميكانيكا وتتصور مع ال light house وفي معبد pagoda
وفي آخر اليوم ممكن تزور مدينة كولمبو بس دى أزحم مدينة في سريلانكا اتمشي في البلد وشوف المباني هناك حلوة اوى
اخيراً الإيجابيات في سريلانكا وحاجات مهمه لازم تعرفها لو رايح سريلانكا
- البلد هدوء واهلها طيبين وفىه نظام والناس امينة و بيحبوا يساعدوا بعض
- الاسعار رخيصة جدا جدا للى حابب يسافر أول مرة
- المدن الساقعة هي نوراليا وايلا بس هتنبسط خد جاكت معاك
- خد معاك كوتشي مريح عشان وانت بتطلع جبال
-اهم حاجة الكاميرا بتاعتك
-الخط اللى تشتريه من هناك DIALOG بــ 1300 روبية وبيديك 9 جيجا و النت سريع جدا
- بلاش تسافر بالليل هتبقى علي اعصابك لا متلحقش الباص فحاول تظبط سفرك كله يبقي بالنهار لما تحب تروح مدينة تانية وانت نازل المدينة اسأل علي مواعيد الباصات للمدينة اللي بعدها
- يفضل انك تشتري شمسية هتحتاجها وكمان لذيذة انك تمشي تحت المطر
- التوكتوك هناك ليه برنامج زي Uber اسمه pick me up
- لو مش بتحب الاكل اللى فيه شطة او بهارات كتير ممكن تعمل حسابك تاخد معلبات خفيفة تنفعك شوية
المصدر : صفحة traveller experience
