جزيرة بالي من أجمل الجزر الموجودة فى اندونيسيا وتعتبر وجهة سياحية رائعه وترضي جميع الاذواق ومع اقتراب موسم السفر الي بالي وذيادة الرحلات السياحية لها هنتعرف علي أهم المزارات والاماكن السياحية فى بالي واسعارها وهنجاوبك عن تساؤلاتك كتيرة بتدور في دماغك لو بتفكر تسافر بالي .. 

هنقسم المقال لجزئين : 

الجزء الاول : اجابة كل تساؤلاتك بخصوص السفر الي بالي من حيث ( التأشيرة - كيفية التنقل داخل بالي - اشهر مطاعم بالي - أفضل اماكن السكن في بالي ) 

الجزء التانى : هنتكلم فيه عن المزارات والانشطة الترفيهية فى بالي واسعارها 

-------------------------------------------------------------------

الجزء الاول : اجابة كل تساؤلاتك بخصوص السفر الي بالي من حيث ( التأشيرة - كيفية التنقل داخل بالي - اشهر مطاعم بالي - أفضل اماكن السكن في بالي ) 

 

جديد : استمتع بشهر عسل مايتنسيش في بالي / سنغافورة 

بتفكر تقضى شهر عسل مميز من غير ما تدفع فلوس كتير ، قضى 7 ايام في سنغافورة وبالي واستمتع باحلى لحظات شهر العسل في أجمل مدن اسيا.

 احجز البرنامج من هنا 


1- متطلبات دخول بالي وهل يحتاج السفر الى بالي لتأشيرة ؟ 

بالي دخولها بتأشيرة بتتاخد في مطار بالي مجانا لمدة 30 يوم .. ولو حد حابب يزود التأشيرة لـ 60 يوم بيدفع 25 دولار هناك 

ومش بتحتاج  تصريح أمني ولا كشف حساب بنك ولا أي أوراق غير باسبور جاري وتذاكر طيران فقط

--------------------


2- طريقة التنقل داخل جزيرة بالي وانواع المواصلات بها ؟ وكيفية الحصول علي رخصة دولية ؟

- المواصلات في جزيرة بالي 5 انواع : 

 1) أشهرهم والأكثر شعبية إنك تأجر سكوتر "بحوالي 60 جنيه يوميا"  

2) لو عايزين حاجة مريحة هناك فيه ابلكيشن اسمه Grab زي Uber كدة بالظبط "يفضل تكونوا مسجلين برقم محلي أحسن"

3 )  الـ Blue Taxi زي التاكسي الأبيض كدة بس لو مفيش عداد فاصلوا معاهم واعرفوا المسافات وحاولوا تقدروا على قد ما تقدروا

4) تتفقوا مع سواقين بعربياتهم يوصلكم وتتفق معاهم على day trip وممكن هم يظبطولكم اليوم بـ حوالي 350 ألف روبية في اليوم 

5) تأجير عربية بتتفق عليها من خلال الفندق وبتكتب عقد التأجير هناك وتسلمها في المطار وأنت مسافر عند صالة المغادرة بس لازم تاخدوا بالكم إن الدريكسيون يمين وكل حاجة متشقلبة

طب لو انت حابب تأجر عربية او سكوتر يفضل يكون معاك رخصة دولية .. السؤال دلؤقتى 

كيفية الحصول علي رخصة دولية ؟ 

الرخصة الدولية بتطلع من نادي السيارات والرحلات المصري اللي في وسط البلد 

دة المكان الوحيد اللي في مصر اللي تقدر تطلع منه الرخصة الدولية بتبقى صالحة لمدة سنة 
بـ 10 جنيه هتطلع من هناك شهادة التحريات والرخصة نفسها بـ 500 جنيه 

والأوراق المطلوبة : 
- أصل وصورة رخصة السواقة المصرية 
- الباسبور وصورة منه
 -اصل وصورة من البطاقة الشخصية 


--------------------

محتاج pocket money كام في اليوم  ؟ 

في الحقيقة مش هنعرف نقولكم كام بالظبط عشان كل واحد ودماغه ومفيش حد هيقدر يحدد رقم بالظبط بس لازم تبقوا واخدين فلوس أكتر من اللي محددينها للطوارئ  أو لفسحة مكنتش محطوطة في الخطة


--------------------

أغير عملة منين في بالي ؟

وإنتوا جوة المطار هتلاقوا فيه صرافتين فلوس قدام بعض الاتنين بنفس السعر بالظبط متغيروش الفلوس كلها ممكن تغيروا 100 دولار بس عشان يبقى معاكم فلوس تاكسي وأي مصاريف أكل أو أي حاجة تانية عشان الـ rate في المطار بيبقى أقل من بره وعشان احيانا بيحصل لغبطة في عد الفلوس وممكن يتنصب عليك 

افضل مكان تغيره منه الفلوس هي صرافة BMC نضيفة جدا ومنتشرة في كل حتة وبيعدوا الفلوس قدامكم ويخليكم تعدوها براحتكم وكمان بتاخدوا وصل بالفلوس فـ النصب معدوم عندهم وانتوا في اي مكان افتحوا Google maps و اكتبوا BMC money change هتلاقيها كتير

----------------------

 أقعد في أنهي مدينة في جزيرة بالي وأظبط الأيام على أساس إيه ؟ 

على حسب رايحين كام يوم يعني مثلا لو إسبوع ممكن أول ليلة تقضيها في فندق جنب المطار عشان متضيعش وقت كبير

بعد كدة Ubud بعدد ليالي كويس عشان تلحقوا تروحوا الأماكن المهمة هناك وبعد كدة ليلتين مثلا في Kuta أو Denpasar 

و مدينة دينباسار موقعها في النص ورابطة كل المدن ببعض
 
-----------------------


أكل فين في بالي واشهر مطاعم الاكل الحلال ؟  

-الفطار أسهل حاجة يبقى في الفندق وأغلب الفنادق هيخلوكم تختاروا من كذا حاجة متاحة 

والأكل الحلال هناك هتلاقوا ماك وبرجر كينج و بيتزا هت ودومينوز بيتزا والحاجات اللي متعودين عليها بس بطعم أحسن من هنا 

لكن في مجوعه مطاعم هنرشحهالكم بردو عشان لو حبيتم تغيروا في الاكل : 

- Sawah Indah Resto دة مكان في Ubud تحفة جدا ممكن تفطروا فيه وأسعاره ظريفة 
- Liap Liap مطعم في أوبود برده 
- Cosmic Diner موجود في كوتا 
- The Holy Crab موجود في كوتا برده 


ولو حابب تعرف اكتر عن باقى المعلومات اللي هتفيدك قبل السفر الي بالي ممكن تشوف المقال دة : كل ما تريد معرفته عن السفر الي اندونيسيا 

---------------------------------


الجزء التانى  : الاماكن السياحية والأنشطة الترفيهية في بالي واسعارها 

المزارات والأنشطة في بالي وأهم المعلومات عنها 

1- Sekumpul Waterfall 

شلال شمبول من أشهر الشلالات اللي في جزيرة بالي المكان هناك عبارة عن متاهة فيها 7 شلالات 
يبعد عن اوبود بحوالي ساعتين بالعربية ، الفرد بـ 125 ألف روبية ..خلي معاكم  tour guide أحسن لان المكان عبارة عن متاهه .. لكنه مكان خيالي بالمعنى الحرفي علي الرغم إنه بعيد بس لازم يتراح بجد

--------------------

2- Tegalalang Rice Terrace

رسوم الدخول: 10 آلاف روبية
مزرعة رز كلها أخضر في أخضر ومن كتر الخضار اللي هتشوفوه هتحسوا براحة نفسية غريبة وتبقوا عايزين تفضلوا قاعدين فيه من غير ما تتحركوا

المزرعة فيها Bali Swing المرجيحة المشهورة والـ Nest للي حابب يتصور 
المرجيحة بـ 100 ألف روبية والعش بـ 50 ألف تقريبا

--------------------

3- Pura Tirta Empul 

رسوم الدخول: 30 ألف روبية

ودة معبد هندوسي معروف بالمياه المقدسة فيه ينابيع مقدسة للنقاء الروحي .. 
وطبعا اللي هيدخل هيلبس السارونج الأندونيسي ..

--------------------

4- Monkey Forest 

رسوم الدخول: 50 ألف روبية

وغابة القرود عبارة عن غابة كبيرة جدا كلها قرود في كل مكان .. بتبقى ماشي وحواليك القرود من غير أقفاص ولا حاجة

--------------------

5- Goa Gajah – Elephant Cave 

رسوم الدخول: 20 ألف روبية

كهف الفيل .. بس مش هتلاقوا أي أفيال فيه لكن المكان كبير جدا كله منحوتات أثرية وجناين وكل مكان فيه نافورة ظريفة كدة وشلال صغير

--------------------

6- Tirta Gangga 

رسوم الدخول: 30 ألف روبية

القصر الملكي للمياه المقدسة أو الترجمة الحرفية ليها water of the Ganges المكان عبارة عن جناين وكل مكان فيه نافورة شكلها حلو جدا وكباري صغير عشان تعدي البحيرات اللي هناك ..

--------------------

7- Temple Of Lempuyang Luhur 

أشهر معبد في بالي اللي لازم كله يروحه عشان يتصور أشهر صورة اللي هي في المعبد اللي قدام الجبل على طول 

بعيد شوية بس يستاهل الحقيقة بتدفعوا تبرع 10 آلاف روبية تبرع للمعبد عشان تاخدوا السارون وبس كدة

--------------------

8-Bali Zoo  

تذكرة الدخول بـ 400 وشوية ألف روبية

ودي جنينة حيوانات بالي من أكتر الحاجات اللي ممكن تنبسط فيها لو بتحب الحيوانات 

الجنينة منظمة ونضيفة جدا هتلاقوا شوية حيوانات بتتمشى من غير ما تكون موجودة في أقفاص في كل مكان هتلاقوا حوض خشبي ظريف كدة بحنفية وصابون عشان تغسلوا ايديكم 
واللي حابب يركب فيل أو يأكله أو يأكل حيوانات تانية هتلاقوا الاسعار مكتوبة هناك

--------------------

9- Tanah Lot 

رسوم الدخول: 60 ألف روبية للفرد و 5000 للعربية

أشهر معابد بالي خصوصا إنه في البحر كمان الجو هناك بيبقى تحفة جدا 
المكان كبير والتصوير فيه حاجة خرافية الحقيقة من اجمل الاماكن السياحية في بالي اللي لازم تروحوها

--------------------

10-Bali Swing 

لمحبي المرجيحة بتاعة بالي وفكرة التصوير في Nests كثيرة بخلفية تحفة يبقى دة المكان بتاعكم

هو غالي شويتين بس ممكن تطلبوا منهم offer أحسن من غير لا أكل ولا أنشطة موجودة هناك وتتفقوا معاهم إنكم تتصوروا بس 
يستاهل الفلوس..

--------------------

11-Nusa Penida Island 

جزيرة نوسا بينيدا .. جزيرة كدة تحسوها من أفلام الخيال اللي مش هتصدقوا الصور غير لما تشوفوها بعينكم 
بتحجز فيها رحلة يوم واحد هتلاقي اليوم عدي بسرعه من جمال المكان وفيه هناك 3 شواطي اجمل من بعض 

Angel's Billabong - Kelingking Beach - Crystal Bay 

--------------------

12-Tegenungan Waterfall

رسوم الدخول: 15 ألف روبية

شلال من الشلالات الظريفة هناك وتنفع اللي حابب ينزل المياه 

--------------------

13- Payung Rafting 

الرافتينج من أهم الحاجات اللي هتتبسطوا بيها جدا هناك

يفضل إنكم تحجزوا عن طريق الفندق اللي إنتوا نازلين فيه عشان تاخدوا خصم حلو

هتسمع اسعار مختلفه ما بين 400 ألف و 350 ألف لكن الـ guesthouse او الفندق ممكن يحجزولك  بـحوالي  300 ألف 

* أغلب الأنشطة اللي هتعملوها زي كدة خلوها من الفندق وقارنوا الأسعار اللي بتشوفوها على النت أو من السواقين اللي هتكلموهم متستعجلوش في الحجز خدوا وقتكم

--------------------

ودي بقى حاجات تانية ممكن تشوفوها لو روحت بالي تانى هتبقى عشان الحاجات دي او ممكن تجرب تروح حاجات منهم في رحلتك .. 

الشلالات في بالي : 

Git Git Waterfall
Nungnung Waterfall
Tukad Cepung Waterfall
Hidden Canyon Beji Guwang
--------------------

المعابد في بالي :

Uluwatu Temple
Ulun Danu Batur
Besakih Temple
Taman Ayun Temple

--------------------
 

الشواطئ في بالي : 
Dreamland Beach
Suluban Beach
Green Bowl Beach
Virgin Beach
Jimbaran Beach
--------------------

ولو حد بيحب ال hiking ممكن تجربه في جبل mount batur ودة جبل إرتفاعه 1700 متر فوق سطح البحر

ممكن تتفقوا مع الفندق إن يظبطهلكم بسعر كويس هتتحركوا من 2 ونص بليل أو 3 مثلا على ما توصلوا للمكان اللي هتبداوا منه 
وبعدها توصلوا على الشروق كدة فوق الجبل ..

--------------------

لو بتحبوا روقان الدماغ والمشي يبقى تروحوا Campuhan Ridge Walk تتمشوا فيه 

دة ممشى معمول في وسط الطبيعة ومزارع كلها خضره.. تمشوه في حوالي ساعتين 

خدوا معاكم مياه ومتنسوش تلبسوا كوتشي مريح عشان متتعبوش بسرعة

--------------------

Upside Down World


تقريبا الدخول فيه بـ 100 ألف روبية 
من الأماكن الظريفة اللي ممكن تروحها في بالي
هتتصوروا فيه صور لذيذة جدااا .. المكان معمول فيه كل حاجة بالشقلوب 
وتتصوروا كأنكم طايرين في الهوا .. شوفوا الصور بتاعته هتعجبكم جداا

--------------------

Dream Museum Zone

متحف 3D للتصوير