ما يحتاجه كل مسافر الي تايلاند : تعرف علي اسعار ( السكن - الانتقالات - أهم المعالم السياحية في اشهر مدن تايلاند )

Thailand تايلاند 

خلينا نتفق ان تايلاند حاليا بقت من اهم الوجهات السياحية فى العالم عشان كدة في المقال دة هنديلك نبذة سريعه عن تايلاند ونقولك شوية معلومات عن مدن تايلاند من حيث ( السكن - طريقة التنقل من والى المدينة وداخلها - الاكل ) وكمان هنعرفك بأفضل الجزر الموجودة فى تايلاند 

تتقسم تايلاد كالاتى
( مدن ..مثل مدينة pattaya ، مدينة bangkok ، مدينة phuket  ، مدينة krabi  وغيرهم - جزر - معابد - شواطئ - كهوف )

تعالى نحدد أهم المدن السياحية في تايلاند متوسط اسعار الاقامة بكل مدينة 

1- بانكوك العاصمة : أهم المعالم السياحية - اسعار السكن - الاكل - المواصلات في بانكوك

بانكوك : مفهاش اى حاجة ممكن تشدك غير شوية الشوبينج ومعابد وشوية نايت لايف وطبعا عمليات التجميل ( آخرها تقضي هناك يومين او تلاته)

اشهر المعالم السياحية في بانكوك : 

معبد وات ارون - القصر الكبير - سفارى ورلد بانكوك  - سي لايف - دريم ورلد بلازا

بالنسبة للأكلات في مدينة بانكوك:

ممكن يبقى قليل لو لقيت أكل حلال في بانكوك بس ساعات عربيات أكل الشارع بتكون حلال وفيه وجبات في 7 Eleven حلال اتأكد منها الأول.

السكن في بانكوك : 

ممكن تسكن في هوستل هناك الاسعار بتكون في المتوسط 100 بات يعنى حوالي 50 جنيه في الليله 

المواصلات في بانكوك:

الباصات العامة موفرة جدا وتغطي كل مكان في بانكوك والمترو في بانكوك غالي مش رخيص، تجنبوا ركوب التوكتوك.

2-  شانغ ماي ( شان ماي): أهم المعالم السياحية - اسعار السكن - الاكل - المواصلات في شانغ ماي

عاصمة الشمال يعني الطبيعة وحديقة الافيال والحديقة العامة هتشوف فيها الباندا، بتبعد عن بانكوك 700 كيلو لو روحتها بالقطر فالمشوار هياخد حوالي  12 ساعة

المعالم السياحية فى مدينة شانغ ماي 

حديقة حيوانات شانغ ماي Chiang mai zoo - حديقة السفارى الليلية  night safari - حديقة الفيله - شلال ماي يا  mae ya waterfall - السوق الليلي - معبد الجبل الذهبي - البلدة القديمة mai's old city

الأكلات في شانغ ماي :

نفس الموضوع قليل جدا لما  تلاقي أكل حلال أو مطاعم حلال في المدينة .

السكن في شانغ ماي :

اسعار الهوستيل ممكن تكلفك من 80 ل 100 بات يعني حوالي 50 ج مصري برضو في الليله

المواصلات في شانغ ماي :

فيه عربيات ربع نقل مغطاة كدا بتتجول في المدينة بتقوله رايح فين هيقولك 50 بات قوله اخرك 20 هيوافق 

3- مدينة بتايا ( pattaya ) : أهم المعالم السياحية - اسعار السكن - الاكل - المواصلات في بتايا

تبعد عن تايلاند حوالى ساعتين بالباص وممكن تروح من مطار بانكوك هتلاقى مواصلات لمدينة بتايا 

- بتايا تعتبر أول مدينة ساحلية من ناحية الشمال تخيل قدامك خريطة بانكوك فوق وبتنزل لتحت .. بتايا من وجهة نظرنا متنفعش للعائلات وخاصة لو فى اطفال دة بسبب انها اكبر مدينة nightlife لو بتحب السهر والنايت لايف يبقى مدينة بتايا بتاعتك ( ممكن تقضى فيها يومين)

المعالم السياحية فى مدينة بتايا 

حديقة لونج نوتش الاستوائية - ميني سيام - underwater world pattaya - شاطي جومتين - السوق العائم - حديقة النمور 

الاكل في مدينة بتايا :

فيها أكل حلال كتير وفيه مطاعم عربيه كتير.

المواصلات في مدينة بتايا:

زي شانج ماي عربيات مغطاه وبتتجول في المدينة وآخرها 10 بات .

السكن في مدينة بتايا:

ممكن تسكن ب 80 بات يعني 40 جنية مصري في الليله .

4_ كرابي جنوب تايلاند: أهم المعالم السياحية - اسعار السكن - الاكل - المواصلات في كرابي

مدينة في جنوب تايلاند تبعد عن بانكوك 700 كيلو ممكن تروحها بالقطر برضو وتبعد عن بوكيت ساعتين بالعربية.

الاماكن السياحية في كرابي 

جزر phi phi - شاطئ railay beach - معبد كهف النمر 

السكن في مدينة كرابي تايلاند:

ممكن تسكن في هوستيل ب 200 بات في الليلة يعني 100 جنيه وهيكون شامل الافطاركمان 

الأكلات في مدينة كرابي:

أرخص مدينة في تايلاند كلها في الأكل وأكبر مدينة فيها نسبة مسلمين وكلها أكل حلال ورخيص جدا.

المواصلات في مدينة كرابي:

المدينة صغيرة تكاد تكون مفيهاش موصلات بس فيه شاطئ بعيد عنها ب نصف ساعه دا بتاخد العربية المغطاه ب 50 بات ذهاب فقط.

ومدينة كرابي أجمل مدينة ممكن تزورها في تايلاند وأهدي مدينة وطبيعتها جميلة جدا ودا لان الحكومة شغاله ع بوكيت أكتر من كرابي لذلك تلاقيها مدينة صغيرة وطبيعية جدا.

فيها أجمل شواطي في تايلاند  ومنها ممكن تزور جزيرة Phi phi islands ومنها تقدر تروح اي جزيرة ممكن تروحها من بوكيت بس أقل في السعر من بوكيت..

وعشان تفرق بين الجزر فى تايلاند لازم تعرف انها بتنقسم لنوعين من الجزر :

النوع الأول من الجزر في تايلاند  ( جزر تقدر تقيم فيها يعنى هتلاقى موجود اوتيلات وحياة كاملة )

مثال ( koh tao-koh phangan – koh samui- phi phi island –krabi-koh yao yai)

*النوع الثاني من الجزر ( جزر مفهاش اى نوع من الإقامة غير انك بتروحها tour انك تحجز رحلة من خلال مكاتب السياحة )

ودة هتلاقيهم كل 3 متر بس حاول تفاصل وتشوف اكتر من مكان لان الاسعار بتختلف مثال ( Hong island – maya bay ) وطبعا فى جزر كتير 

لو عاوز تقضي honeymoon في تايلاند هنجاوب على اكتر الاسئلة اللى ممكن تدور فى دماغك وانت بتختار تايلاند كاوجهة ليك لشهر العسل 

1 - تايلاند افضل وجهة سياحية مقارنة بأى دولة تانية تعتبر من احسن الدول في السياحة وفيها حاجات كتيرة ممكن تعملها وتزورها 

2 - تايلاند تعتبر رخيصة لحد كبير مقارنة مثلا ببالى او الفلبيين وممكن تبقى احسن كمان من ناحية السياحة دة غير ان السفر لتايلاند سهل جدا  والاوراق المطلوبة انك لو بتشتغل محتاج شهادة راتب مقدمة لسفارة تايلاند وكشف حساب 3 شهور فيه 10 آلاف جنية وحجز طيران وحجز فندق و 700 جنية للفيزا و يومين بتستلم الفيزا ولو طالب مثلا بتجيب ورقة من الجامعة بدل شهادة الراتب وتقدم وهتاخد الفيزا بمنتهى السهوله 

3 - تايلاند الي حد كبير امان الناس فيها عارفة يعنى اية سياحة والشرطة مسيطرة لحد كبير وبتحافظ على السياحة لان دة تقريبا الدخل القومى للبلد 

4 - لو بتحب البحر تايلاند عندها جزر وشواطئ تنافس دول كتير جدا 

5 - من افضل الدول الاسيوية فى موضوع الاكل هتلاقى الاكل الى يناسبك ومش هيبقى فى مشكلة نهائى وطبعا تايلاند من احلى البلاد الى فيها فاكهة دى متعة تانية 

6 - يومك فى تايلاند مليان بين الهدوء والبحر والطبيعة بين الشوبينج والسهر والنايت لايف بين الانشطة والحيوية 

7 - شهر العسل مش انك تبقى اعد فى اوتيل او ريزروت واعد طول النهار فى مكان واحد دى فكرة سيئة جدا وهتسبب بعد اول يومين زهق وروتين لازم يبقى فى تنوع فى يومك وحركة وبتعمل اكتر من حاجة دى احسن وقت انك تعيش فية ذكريات 

8 - هل لازم اطلع مع شركة سياحة ؟؟ لا خالص الموضوع سهل جدا والميزة فى تايلاند انها اكبر بلد فيها عدد فنادق هتلاقى اسعار مناسبة ديما

9 - فى اماكن شبهة المالديف كدا ، هتلاقى resorts واخد جنب فى جزيرة لوحدة بيمنعك عن اى حاجة غير انك شايف المية من كل الاتجاهات وعاملك شوية انشطة جوة عشان متزهقش كمان نسبة الهدوء والاستجمام 100 % ولو زهقت من الهدوء بسهولة هتلاقى نفسك فى جزيرة تانية زى koh samui _ phi phi _ phuket ترجعك للحياة تانى وبرضة هتلاقى نفسك مستمتع بالطبيعة

 10 -  مش هتشيل هم المواصلات في تايلاند من اول ما توصل المطار لحد ما تقرر عاوز تروح فين هتلاقي وسائل النقل هناك كتيرة مثال : -مطار بانكوك او بوكيت : الاتنين فيهم مكاتب مواصلات باسعار رخيصة جدا جدا على سبيل المثال مطار بوكيت اول ما بتنزل بتلاقى زى كشك جوة المطار مينى باص ب 180 بات بيروح لاى مكان بمقارنة بالتاكسى ب 800 - 1000 بات الموضوع كلة محتاج انك تعرف شوية عن البلد قبل ما تروح 

هل اقدر اسافر بلد تانية مع تايلاند بتكلفة قليلة ؟؟؟
الاجابة : نعم تقدر تسافر ماليزيا سعر الطيران فى حدود 1000_ 1200 جنيه لان المسافة بينهم ساعة وربع تقريبا وماليزيا من غير فيزا يعنى هتحجز وتسافر على طول 

نصيحة قبل ما تسافر تايلاند خليك عارف ان : 

-بانكوك  شوبنج فقط ومتقعدش فيها اكتر من 3 ايام .

-باتايا مش اي حد بيتأقلم فيها  لكن الناس اللي بتروحها بتروحها علشان ساعتين من بانكوك وجنوب تايلاند احسن بكتير في الشواطئ.

- شانغ ماي اللي عاوز طبيعه وحديقة فيلة كبيرة لكن هي بعيدة

- كرابي افضل من بوكيت لانها طبيعية اكتر وارخص من بوكيت.

- أفضل وقت تسافر فيه تايلاند وتستمتع بالجو هي الفترة من شهر نوفمبر حتى شهر فبراير

وممكن تعرف اكتر عن : طريقة استخراج فيزا تايلاند للمصريين وكسفية الحصول عليها بسهوله