مرسى علم... مالديف مصر.. 

من اجمل الاماكن اللي ممكن تزورها في مصر ومن اجمل البلاد على البحر الأحمر واللي بجد مظلومة جدا ولازم كل الناس تروح تتفرج علي جمالها الطبيعي وهدوئها وروقانها اللي فعلا يميزها عن الغردقة وشرم الشيخ تحس انك في عالم حالم هدوء مش طبيعي مفيش عربيات ولا زحمة كل حاجة بجد على طبيعتها سواء الشواطئ او الجبال او الوديان تقدر تروح اي مكان محدش هيقولك ممنوع وانا بعتبرها مكان اكتر من رائع للتصوير لان الطبيعة هناك مسيطرة والالوان سواء البحر والرملة والجبال بجد كانك في المالديف فعلا المياة هناك نقائها مش طبيعي تقدر تشوف السمك والشعاب وانت ماشي علي الشاطئ مش محتاج سنوركلينج ولا دايفينج هنكلمكو فى المقال على تجربة تقدروا تعيشوها بنفسكوا هناك .. 

 

لكن قبل ما نبدأ مقالنا عملنالكم عرض وخصومات جامدة جدا على رحلات مرسي علم لو بتفكر تسافر تقضي أجازتك هناك : 

قضي ٤ أيام ٣ ليالي في بلو هاوس (مون ريزورت) ٤ نجوم مرسي علم اقامة كامله + الإنتقـالات بأرخص الاسعار

 

مرسى علم

 

 انت ممكن تعيش تجربة السفر الى مرسي علم دى  معتمد على نفسك في كل حاجة او تروح مع  جروب كبير تتطلعوا سوا هيوفر معاك كتير في الرحلات عشان الانتقالات هناك غالية نظرا لبعد المسافات .. 


1_ البداية هي المواصلات :

هتحجز اونلاين من جوباص وتختار المكان اللي عايزاه بمنتهي السهولة سعر التذكرة تقريبا  210 من القاهرة بتاخد حوالى  10 ساعات ودا بيفرق طبعا معاك وانت بتحجز الفندق عشان هتوصل بدري علي 10 صباحا وتعمل check in بدري

وهكذا بتحجز الرجوع واحسن حاجة انك بتتفق مع السواق ينزلك قدام الفندق وهما متعاونين جدا لان مرسى علم المدينة بعيدة عن الفنادق ومفيش مواصلات فلازم تركز في النقطة دي وانت راجع برده بتستناه وتتواصل مع المكتب ويوقفلك قدام الفندق

فمتشيليش هم ازاى توصل للفندق وازاي هتروح ودي اول نقطة بتخوف الناس عشان تروح لوحدها نظرا لبعد الفنادق..


2_ الاقامة :

ممكن تختار االفندق اللي يناسب امكانياتك من هنا ويفضل تكون قريب من مرسى علم أو تكون قريب من بورتو غالب لو عايز مكان تخرج فيه بليل بس هى عمتاً مبتفرقش لان كل الفنادق فى مرسي علم بتعمل برنامج ليلي وكمان الحياة في مرسي علم هي البحر والطبيعة بالنهار مفيش حاجة تتعمل بليل زى شرم والغردقة. فى فندق هناك اسمه Aurorabaymarsalam هو يبعد 15 كيلو عن مرسي علم وسعره مناسب جدا والشاطئ في خليج اكتر من رائع مليان بالشعاب المرجانية والسمك وهدوء رهيب ونصيحة تحجز Half Board or Allinclusive لانك صعب جدا توصل لسوبر ماركت او مطاعم لان البلد بعيدة عن معظم الفنادق ومفيش مواصلات هي طبعا زي ما قلنا مرسي علم للروقان والهدوء عسان متشيلش هم هتاكل ازاي وفين

3_ الرحلات في مرسي علم :

طبعا اول ما هتوصل الفندق هتلاقي رحلات تبع الفندق غالية جدا و بيعتمدوا علي انك هتطلع معاهم لان مفيش مفر زي ما قلنا لان مفيش شركات سياحة في البلد زي شرم بس ممكن تشوف مرشد وتتفق  معاه على رحلة القلعان ومحمية وادي الجمال وشاطئ حنكوراب و النيزك هيكون عارف كل المعلومات والتفاصيل يشرح لك كل الاماكن ..هتروح شاطئ حنكوراب وتشرب احلى فنجان قهوة بالجنزبيل ( دا مشروب قهوة سوداني عليها جنزبيل بيعملها قبيلة العبابدة) وبعدها ممكن تروحوا لاحلى اماكن السنوركلينج وهتلاقى هناك  كل المعدات اللي محتاجينها وبعدها علي القلعان وشاطئ المنجروف ودة حاجة كده ولا في الخيال مكان خرافي روقان وهدوء وصور وهمية وبعد كده ممكن تطلع  علي منطقة اسمها النيزك ميعرفهاش غير اهل البلد عاملة زي بلو هول مليانة شعب مرجانية بيقولوا نيزك وقع في المنطق دي وعلي الطريق بقي محمية وادي الجمال طبيعة وهمية بجد و كمان فيها جزر واماكن كتير بس احنا ملحقناش نروح كل حتة. التلات اماكن دول تقدر تروحها في رحلة من 9 صباحا ل6 مساء  بس

مرسى علم

 القلعان - شاطى المنجروف


4 : رحلة سطايح لزيارة بيت الدولفين :

لو معاك مرشد كويس هينطملك رحلة اكتر من رائعة في سطايح بعد محمية وادي الجمال حوالي ساعتين من مرسي علم وساعتين في البحر. الليموزين هيعدي عليك في الفندق الساعة 6 صباحا وتركب اليخت من مرسي حماطة رحلة رائعة والجو مختلف والمياه فيها  صافية وزرقاء بدون موج وتشوف الاسماك والشعاب بوضوح دخلنا ساعتين في البحر تقدروا وقتها تنزلوا في زورق لأقرب نقطة كميات دولفين كتير وتعوموا معاهم واللي عايز يتصور بيبقي في مصور مخصوص تحت المياه الدولفينز كتيرة لان المكان دا بيتهم وكل مايمشوا بيجي مجموعة تانية بجد حلوين اوي وهما بينطوا في المياه وانت عايم في وسطهم وبعد كده بترجعوا تانى علي اليخت للغدا وتنزلوا للسنوركلينج تاني في شعاب وهمية الوانها رائعة وانواع سمك اول مرة هتشوفها مختلفة عن سفاجا والقصير و شرم عالم تاني تحت المياه بجد وانصح اي حد معاه جوبرو لازم يخدها يوثق الجمال اللي احنا منعرفش حاجة عنه


5_ رحلة مرسي مبارك او شاطى ابو دباب :

طبعا مرسي علم معروفة بالسلاحف البحرية الكبيرة اللي تقدر تشوفها بكل سهولة في ابو دباب علي الشاطئ او تركب الغواصة من بورتو غالب وتشوفها في مرسي مبارك ولو حظك حلو هتشوف الدورانجو حيوان عامل زي عروس البحر وهو نادر جدا وموجود في المنطقة دي وكمان في مركب بتتطلع من بورتو غالب اسمها نفرتاري لو عايزة حاجة مميزة ويوم كامل بيبقي غداء و سنوركلينج وتزور بورتو غالب تتمشي فيها هي صغيرة وكلها كافيهات علي مارينا تقدرو تظبطوا البرنامج بتاعكو على حسب عدد الايام اللي هتقعدوا فيها وكل واحد علي حسب ميوله طبعا 

 

مرسى علم

الدورنجو (عجل البحر )


6_ رحلات سفاري في الصحراء مع عشاء بدوي : 

الرحلات دى موجودة هناك بردو بس بتكون شبيهة للـ فى  الغردقة وشرم وفي كمان ناس بتروح وادي الجمال تتصور هناك طبيعة مختلفة مش موجودة في اي مكان تاني
اخر حاجة بجد مرسي علم جميلة جدا ومكان مبهر بجد لسه علي طبيعته تحس انك في عالم تاني وهدوء وجمال وفعلا مفيش زحمة ولا دوشة والاجانب عارفين قيمتها واحنا للاسف منعرفش عنها حاجة انا شايفة انها مناسبة لاي كابلز او اي جروب عايز يهدي اعصابه بجد من اجمل الاماكن اللي ممكن تزورها في حياتك واشجعكو كلكم تزورها .

 

مرسى علم

 

 
المصدر : صفحة traveller experience