المطاعم و الكافيهات فى دهب
جديد : نفسك تسافر دهب تستجم وتجرب كل حاجة هناك ؟
الحق أحجز معانا الرحلات والانشطة فى دهب واعرف اخر العروض اللى هتظبط مزاجك - شوف اجدد الرحلات واحجزها من هنا
-المطاعم : هناك هتلاقي مختلف المطاعم منها الشرقي و منها الغربي عشان كده هنقسم المقال ده كذا نقطه عشان تعرف انت عايز ايه.
اولا المطاعم الشرقيه فى دهب
طبعا شرقي يعني فول و طعمية و مشاوي
*مطعم يم يم
ده مطعم في اول الممشي منطقه المشربة و ده بيقدم الأكل الشرقي فول و طعمية و بطاطس و مسقعة و بيقدمها سندويشات و اطباق و في قاعدة هناك لو حابب و اسعاره عاديه زي اي مكان مش سياحي يعني.
*مطعم king of chicken
ده اول الممشي منطقة المشربة و ده بيقدم مشاوي سواء لحوم او فراخ واسعاره تعتبر متوسطه يعني وجبه مكونه من نص شيش طاووق و سلطه خضراء و طحينه و شوربه لسان عصفور و عيش ب 65 جنيه
النص فراخ ساده ب 45 جنيه
وزي ما قولنالكم بيقدم كفتة و كباب مشوي باسعار عادية و طبعا الاكيل لازم يعرف انها لحمه مستورده مش بلدي و هيعرفها من شدة اللحمه بس كانت حلوه التتبيلة.
- عايز تاكل سي فود
اشهر تلات اماكن علي الممشي مع فيو علي البحر:
*الفنار
*علي بابا
*فريندز
التلاته نفس المستوى بس يفضل لو اكيل سمك اطلب سمك البغبغاء و ده سمك معروف في البحر الاحمر بيكون ملون و اللحمه مسكره و تتاكل سنجاري
ممكن مع السمكة تاكل شوربه سي فود هي طبعا اقل مستوى من المناطق الساحلية بس تعتبر مقبوله و سعرها في المتوسط 60 جنيه
ثانيا : المطاعم الغربية فى دهب
*ريد كات Red Cat
في منطقة اللايت هاوس
ده لو بتحب تجرب اكلات غريبه ممكن نرشحلك المطعم ده و ده مطبخ روسي واخد اعلى تقييم 4.9 على موقع Tripadvisor وافضل حاجة عنده :
*بيتزا تشيكن مشروم (حجمها كبير جدا يدخل فيها اثنين مرتاح ) و سعرها 85 جنيه ، بيتزا تشيز لافرز 5 انواع جبن ، طبعا ممكن تعمل هاف اند هاف يعني نوعين بيتزا
طيب لو انت نفسك تجرب حاجه جديدة جرب شوربة البورش عبارة عن شوربة بنجر بالكريمة و اللحمه و سعر الطبق الوسط ب 45 و الكبير ب 55
عايز تشرب عصير مختلف اشرب ريد فيترو و ده عباره عن عصير بنجر بالجنزبيل بالتفاح و سعره 45 جنيه
-جيرمان بيكري
في منطقة اللايت هاوس
و ده مطعم ألماني يقدم فطائر ومخبوزات و اطباق كونتينتال و سعر المخبوزات تبدأ من 7 جنيه و قطعتين تشبع
-لامبو كافيه
في اللايت هاوس
لو انت كييف شيشه نرشحلك المكان ده بقوه و اسعاره حلوه تبدا من 20 جنيه
-كريب و بيتزا بشتيكها
في الممشى عند كافيه يلا بار قريب منه
في محلات كتير بتقدم الكريب و البيتزا بس احنا بنرشحلك المكان ده لسبب بسيط انه مش بيعتمد في البانيه علي المعلبات بالعكس بيتبل الفراخ قصادك و يقليها و يعملها كريب او بيتزا
سعر الكريب فراخ بانيه 35 بس نصيحه خليه يحط اكسترا سلامي عليه و هتزود 10 جنيه
الكافيهات علي الممشي السياحي فى دهب
اكتر حاجه بتميز دهب هي الكافيهات علي البحر و الالوان بتاعتها طبعا ناس كتير بتفتكر انها غاليه جدا بس دة مش صح يعنى بالمقارنة بكافيهات القاهرة في هي رخيصه جدا
انتم هتدوروا علي الكافيهات الي فيها مراجيح علي البحر عشان كده تنحصر في تلات كافيهات:
-كافيه same same
كافيه يتميز بالتلات مراجيح علي البحر بس لو طويل مش هتكون مبسوط
ممكن تطلب شاي و سعره 15 جنيه بس و لو عايز تدخل تتصور و بس مفيش مشكله
-كافيه every day
يعتبر من أشهر الكافيهات خصوصا بليل بيكون في فرقه موسيقيه و طبعا في مرجيحه
كافيه Down town
ده نرشحه بقوه خصوصا الديكور بتاعه تحفه و المراجيح بتاعته مريحة و مفيش حواجز فبتتمرجح و انت مرتاح مع اغاني فيروز و في جزء جميل جدا و هي قاعده على شبك شايف طوب ملون مع موج البحر و تسمع طقطقه الظلط مع الموج فجو حلو.
ممكن تطلب شاي اخضر ب 25 جنيه
ملحوظه مهمه
لو انت من هواة التصوير و مش بتحب الزحمه فالكافيهات بتفتح من 7 الصبح و بتبدا تتزحم من الساعه 12 ظهرا فروح بدري اتصور.
لو حابب تعرف اكتر عن دهب ومزاراتها ممكن تشوف المقال دة ( تعرف على كل شبر فى دهب واهم المزارات بها )
او لو عاوز برنامج سياحي مميز لدهب دة ( أفضل برنامج سياحي شامل لرحلة دهب )
تجربة : ا / معتز محمد
