هو انا لما اسافر الغردقه او سهل حشيش أو الجونة ... ايه ال ممكن اعمله غير القعده فى الفندق ؟ 

طيب ايه الاماكن ال ممكن اروحها فى الغردقة عموما بما اننا داخلين على العيد وناس كتير اوى هتتجه إلى الغردقة والجونة ؟؟ ومعلومة المسافة بين الغردقة والجونة 30 كيلو فقط يعنى ممكن فى اى وقت وبسهولة تنزل من الجونة أو سهل حشيش للغردقة والمواصلات متوفرة طوال الوقت .

 

المقال دا مش رحلة ولكن دا برنامج او تقدر تقول دليل سياحي لزيارتك لكل شبر فى الغردقة 

(عشان الغردقة تقدر منها تلف كمان الجونة وسهل حشيش وخليج مقادى وهيكون الأربع اماكن ليهم نفس البرنامج لان جميعهم داخلين مناطق تابعة للغردقة) واهم الحاجات اللى ممكن تزورها هناك . وكمان هنديلك اسعار تقريبية للبرامج اللى ممكن تعملها فى الغردقة عشان محدش يستغلك او يضحك عليك 

طبعا وانت فى طريقك اول حاجة هتعدى عليها هى السخنة وهتقف فى رست زعفرانة هاوس 

التسكين فى اى فندق بيكون مش قبل الساعة 12 الظهر يعنى معنى كدا انك محتاج تريح اول يوم ويكون برنامجك خفيف وبالتالى،،

**اول يوم دا ال هو يوم الوصول:

هيكون هو اليوم الوحيد ال هتقضيه فى الفندق بتاعك .. يعنى تريح وتشوف البلاج الخاص فى الفندق وتنزل البسين

طيب تانى يوم ممكن تعمل ايه ؟؟

هقولك تعمل ايه .. هتشوف اى حد من الناس ال بينظمو رحلات داخلية داخل الغردقة او الجونة ودول مكاتب كتير جدا منتشرة فى كل حتة هناك وكمان ممكن تلاقى جوا الفندق بتاعك .. اسال الريسبشن واطلب منه انك عاوز تعمل رحلة بحرية (يوم كامل) والرحلة هتكون رحلة من الساعة 8 ص الى 4 م شاملة الغداء والمشروبات على اليخت فى البحر الأحمر وتكون لمكان من ثلاثة (محمية جزيرة الجفتون فى الغردقة او جزيرة توبيا فى سفاجا او دولفين هاوس ) والثلاثة حلوين وممتعين جدا ونفس التكلفة تقريبا ... بس نصيحة مهمة جدا ( لو حضرتك رايح دولفين هاوس عشان تشوف دولفين فمش اكيد انك تشوف الدولفين لانه مش شرط يظهر كل يوم عشان متتصدمش / لو معاك اطفال او اسرة فيها اطفال مش بيعرفو يعومو يفضل تطلع جزيرة الجفتون لان فيها شط عالمى رملى تحفه مش هتلاقيه فى اى فندق ومناسب لنزول الاطفال والناس ال مبيعرفوش يعومو ) سعر الرحلة دى شاملة الانتقالات من والى الفندق مش هتعدى 180 جنيه تقريبا . وكمان فى رحلة مجمعة اسمها سوبر جفتون ودى بتكون رحلة كبيرة شاملة كل شيئ من العاب مائية زى البنانا بوت وكمان شاملة جلاس بوت ونزول على الجزيرة وسعرها مش هيعدى 200 جنيه وقبل ما تطلع على اليخت تكون عامل حسابك فى ماسك لو ناوى تنزل تعمل سنوركلينج من اليخت وتشوف الشعاب والأسماك الملونة ودول يتم توفيرهم ليك من المرسى البحري ال هتركب منه أو على اليخت . وممكن لو عاوز تعمل غطس بتنسق مع مشرف المركب قبلها وبتنزل من اليخت

الغردقة

جزيرة الجيفتون

طيب باقى اليوم هتعمل فيه ايه ؟؟ هترجع الفندق تغير وتاخد وجبتك وبعدها تبتدى تستعد عشان المفروض الساعة 8 بالدقيقة تكون موجود فى طريق القرى فى مكان اسمه الف ليله وليله ودى عبارة عن مبنى ضخم قرية فيها حفلات وسهرة حلوة .. هتاخد تاكسى وتقوله ودينى ألف ليلة وليلة والحفلات دى والدخول التكت بتاعه مش هيتجاوز 130 جنيه للفرد بس فى حاجة مهمة وانت بتقطع التكت لازم تاكد عليها على الشباك .. انك تحضر الحفل كامل يعنى العرض التراثي والعرض الفلكلورى والحفل الفني والشرقى لان فى حفلتين بسعرين مختلفين .. فى حفل كامل ال هو ممتع ومفيد جدا وفى حفل فنى فقط ودا ارخص ومش ممتع اوى لكل الناس . الحفلة بتبدء 9 تقريبا وتنتهي 12 بالليل .

 

طيب نيجى بقى لتالت يوم ..

هتصحى الصبح تخد فطارك فى الفندق وبعدها تستعد انك تروح مكان اسمه اكواريوم الغردقة.. ودا بقى مكان رائع جدا عبارة عن قاع بحر مصغر بتنزل تتمشى فيه في احواض وممرات زجاج وتتفرج على الاسماك والشعاب المرجانية وأسماك القرش المفترسة .. ودا عنوانه فى طريق القرى معروف ممكن اى تاكسى او عربية تبع الفندق توصلك سواء كنت فى الغردقة او الجونة أو سهل حشيش .. والمكان دا شغال يوميا من 9 ص الى 6 م بس يفضل تروح الصبح وتاخد جولتك وتتصور عشان على الساعة 11 فى حفلة بتتعمل فى المكان هناك وبتروح تقعد ادام حوض سمك كبير جدا وبينزل غطاس بيعمل عروض مع الاسماك من الساعة 11 الى 12 م وتكت دخول المكان 180 جنيه شامل الجولة كاملة .

الغردقةاكواريوم الغردقة

 

بعد كدا ممكن تعمل حاجة من اتنين يا تطلع من الاكواريوم على مدينة الرمال ودى قريبة من الاكواريوم وتقضى هناك لحد العصر وتكت الدخول بتاعها 120 ج تقريبا او ترجع تخد الغداء بتاعك فى الفندق وتجهز نفسك لرحلة سفاري فى الجبل بالبيتش باجى وغداء بدوى وتحضر الغروب هناك ودى هتكلفك فى حدود 170 جنيه تقريبا للفرد .

طيب ايه هنخلص اليوم على كدا ؟؟ 

لا طبعا هنروح ناخد العشا بتاعنا فى الفندق وننزل على مكان للسهرة اسمه المارينا سواء كنت فى الغردقة عندك المارينا فى الغردقة ممكن تروحها بتاكسى هى قريبة جدا او فى الجونة ممكن تروح مارينا الجونة بتوكتوك هناك وفكرة المارينا عموما هى ممشى سياحى على البحر مليان كافية ويخوت وحفلات خصوصا فى الاعياد وايام الجمعة من كل اسبوع ودخول اى مارينا عموما ببلاش فى اى وقت 

الغردقة

فندق بانوراما بنجلوس - الجونة

 

وفى رابع يوم هتعمل التالى 

هتقوم الصبح وتكون مجهز شنطتك وجاهز للتحرك تفطر وبعد كدا لو انت فى الجونة ممكن تحجز مع الفندق انك تركب الطيارة الشراعية وتعمل احلى مغامرة فى حياتك وتطير فى الجو فوق الجونة ودى طائرة سياحية شراعية فى الجونة فقط سعرها كالاتى 

(10 دقائق طيران ب 200 ج / 15 دقيقة طيران 300 ج / 20 دقيقة طيران 400 ج (الاسعار دى قبل زيادة السولار المقررة قريبا)

 

ولو انت فى الغردقة أو سهل حشيش ممكن جدا تركب الغواصة وبتطلع بيها رحلة لمدة ساعتين وبيكون تمنها 110 جنيه وبتحجزها مع اى مكتب رحلات هناك وبتكون شاملة الانتقالات من والى الفندق .

فى حاجات تانى ممكن تعملها فى الغردقة زى ممكن تعمل رحلة يوم كامل لاكوا بارك هناك ودى برضو بتحجزها مع اى مكتب تنظيم رحلات واليوم ممكن يكلفك فى حدود 250 الى 350 ج

الغردقة

سهل حشيش

البرنامج دا جزء مبسط من اجمل واهم حاجات ممكن تعملها فى الغردقة او الجونة او سهل حشيش فى اى وقت مع العلم ان الاماكن دى فى فترة الصيف بتكون حر شوية ولكن بتفضل من اجمل مدن مصر وبحرها روعة .. وانصحك اوعى تفوت زيارة جزيرة الجفتون والرحلة البحرية وكمان الاكواريوم ولو قدرت تركب الطيارة الشراعية يبقى انت كدا عشت اجمل 4 ايام فى حياتك .

طيب بناء على ايه قبل ما تحجز الفندق بتقرر تنزل فين من الاماكن المذكورة يعنى الجونة ولا سهل حشيش ولا الغردقة ولا مكادى ؟؟

اولا الجونة وسهل حشيش لو حضرتك بتحب الرقى والفخامة سواء فى شوارع حوالين الفنادق او فى مستوى النزلاء فى الفنادق (خصوصا لو شهر عسل) مناسب جدا ليك انك تنزل فى الجونة او سهل حشيش لان ليهم خصوصية وبيتسمو بالهدوء لو حابين الهدوء والجونة عموما عبارة عن كمبوند شيك فيه بحيرات صناعية عامة كتير فى كل مكان هناك وشوارع راقية ونظام مارينا عالمى وملاعب جولف .

ثانيا لو اسرة ومعاك اطفال وعايز مكان يكون فخم ومناسب لاطفالك وفى نفس الوقت عاوز مكان راقى ونزلاء من فئات معينة يبقى تنزل فى خليج مكادى فى اى فندق فيه اكوا بارك اولادك واسرتك هتنبسطو جدا .

ثالثا لو حضرتك عازو دوشة وسط البلد ومواصلات عامة وتنزل فى اى وقت تلاقى ناس ومناطق وقهاوى وشوارع عامة كتير بمعنى اصح حياة المدينة يبقى تنزل فى الغردقة لان فيها إرضاء لكل الفئات والاطراف فيها الفنادق البسيطة والغالية وجميع الفئات .

الطائرة الشراعية فى الجونة بتحجزها من خلال ريسبشن الفندق وهى طيارة واحدة بس مش بتطلع الا من الجونة واوقات كتير جدا مينفعش انها تطير ودا يعتمد على الجو وسرعة الرياح يعنى لو فى اى نسمة هوا الطيارة مش بتطلع . يعنى انت وحظك 

ولو عاوز برنامج سياحى للجونة فقط ممكن تقرأ المقال دة : https://bit.ly/2N6ZVaU

نتمنالكم رحلات سعيدة 

 

الغردقة

سهل حشيش 

المصدر : صفحة فيها حاجة حلوة