افضل المدن السياحية فى تركيا المناسبة للعرسان لتجربة ساحرة فى احضان الطبيعة

 نفسك تقضى شهر عسل بره مصر ؟  فكرت تروح تركيا بس مش عارف تعمل ايه هناك  ؟ دة دليلك لأجمل الأماكن اللى لازم تزوروها في تركيا عشان تستمتع بشهر عسل ميتنسيش.
 
خلينا نتفق ان تركيا من اجمل دول العالم في كل فصول السنه 

تعرف تسافرلها وتستمتع في اي وقت في السنه وبأسعار رخيصه جدا ... خصوصا بعد ما سعر الليرة التركي انخفض كتير لحد ما بقت سعرها اقل من 3 جنيه مصرى

لو هتسافر لوحدك هتستمتع .. لو مسافر شهر عسل هتستمتع اكتر 

هتسافر تصيف وتغير جو هتلاقي طبيعه وجمال وهدوء مش موجوده في دول عالم كتير عشان كدا الاماكن اللى جايه دى مينفعش تفوتها ومتزورهاش وخصوصا لو انتوا عرسان جداد المناطق دى مناسبه جدا لشهر العسل .
 

أنطاليا  Antalya:

 المقصد السياحي الاول لشهر العسل للعروسين. وانطاليا من أفضل الشواطئ في العالم و من أكثرها حصولاً على ” الراية الزرقاء ” و دي جائزة تمنح لأفضل الشواطيء العالمية وده لانها فى الاساس مجموعة من الشواطئ الرائعه والمناظر الطبيعية الساحرة 
 

اماكن تستحق الزيارة اثناء شهر العسل فى انطاليا :

- زيارة شلالات دودين ( Düden Şelalesi)

مجموعة شلالات ذات جمال ساحر , وفيه حواليها مجموعة من المتنزهات و تحتوي على أماكن للرحلات و المطاعم و الكافيهات

- زيارة المدينة المائية في انطاليا ( aquarium )

اكواريوم انطاليا هو الاكبر فى العالم وبيحتوى على نفق مائي 131 متر وفيه قسم الثلج والاسكيمو وقسم اللعب مع الاسماك ، الاكواريوم موجود فى حى كونيالتي بانطاليا
 

-استكشاف المدينة القديمة وسط انطاليا مدينة “كاليتشي” (Kaliçi) واللى بتتمتع بسحر تاريخي يجذب السياح ليها من جميع أنحاء العالم

- زيارة متحف Sandland

متحف جميل جدا وكل شيء فيه منحوت من الرمل ودخوله ب 25 ليرة تركي بس وجانبه شاطئ لارا للسباحة 

- تجربة تليفريك اولمبيوس (Olympos Teleferik)

من محطة الإنطلاق إلى قمة جبل Tahtali على بعد مسافه تبلغ 4359 متر واللى تعتبر من الأطول في العالم ينطلق التلفريك فى رحلته  و تستغرق حوالي 10 دقائق في عربة مريحة ممكن تكفى حتي 80 فرد هتستمتع بمناظر رائعه ورحلة مميزة جدا

- دة غير ان انطاليا فيها كمان مجموعه انشطة مميزة اخرى زى : رحلة rafting و النط بالمظلية او paragliding  ومدينة الالعاب المائية The Land Of Legends / Theme Park  

اسطنبول İstanbul :

المكان دة بيجتمع فيه الشرق والغرب سوا ، اسطنبول مدينة مدهشة عبارة عن مزيج رائع من الهندسة المعمارية ، الثقافة ،  والجمال الطبيعي ، والحياة الليلية . وغير ان اسطنبول مدينة مليانة جمال وطبيعة ساحرة الا انها كمان مناسبة لينا كعرب بصورة كبيرة ومش

هتحس ابدا انك في بلد غريب ، وهتفضل تفتكر ذكرياتك فيها  طول حياتك لو قررت تختار مدينة اسطنبول لقضاء شهر العسل.
 

اقتراحات لتجارب شهر العسل : 

-زيارة جسر البوسفور واللى بيربط بين قارتي أوروبا وآسيا هتشوف من خلاله المدينة كلها سواء الشواطئ الأوروبية او الآسيوية.

-زيارة البازار الكبير اللى بيعد أحد أكبر الأسواق المغطاة في العالم. فيه مجموعة هائلة من المحلات والأكشاك يباع فيها مختلف المصنوعات اليدوية التركية . والسوق هتحس فيه انك فى بلدك من كتر ما فيه جو شعبى مريح جدا

- لازم تاخد جولة في المسجد الأزرق أشهر وأهم المساجد في مدينة إسطنبول ، مسجد السليمانية وآيا صوفيا اللى كان كاتدرائية ثم تحول إلى جامع واخيرا اصبح متحف ..

-زيارة قريتي Bebek و Ortaköy الساحليتين اللى من افضل النشاطات اللى ممكن تقوم بيها بليل 

-وممكن تستمتع بغروب الشمس على جسر غالاطة Galata 

ايا صوفيا 

جسر البوسفور

البازار الكبير

 
المسجد الازرق

قرية Ortaköy 

كابادوكيا Cappadocia : 

من اجمل وجهات شهر العسل في تركيا مشهورة بمنطاداتها الملونه والكهوف والقمم الصخرية اللي منها راح هتشوف سحر وجمال المدينة ،  تحتوي تقريباً على 300 فندق وبتختار منها الاسعار الي تعجبكم والفنادق في كابادوكيا تقريبا  كلها صخرية 
 

أفضل تجارب شهر العسل فى كابادوكيا:

-طبعا بما انك فى مدينة المناطيد يبقى لازم تستمتع بتجربة ركوب المنطاد وتشوف المدينة بغرابتها من فوق فى منظر لا يوصف

-الاستمتاع بفندق الكهف في غوريم اللى بيكون داخل التشكيلات الصخرية الرائعه .

-استكشاف مدينة الــ الجن Derinkuyu و Kaymakli   المدينة المحفورة تحت الأرض تمتد على عمق حوالي 60 متراً

-زيارة متحف غوريم المفتوح  Göreme Open-Air والمتحف دة عبارة عن مجموعة كنائس وفيه عدد من الجداريات المدهشه لعصور من القرن ال 10 ميلاديا حتى القرن 12 ميلاديا 

- زيارة استكشافية لمدينة غوريم بالكامل 

مدينة مارماريس Marmaris : 

مدينة مارماريس الساحرة تقع في جنوب غرب تركيا على ساحل البحر الأبيض المتوسط , وتعتبر منتجع سياحي راقي  وبسبب موقعها على بحر إيجة تعتبر مارماريس مركز جذب سياحي مهم وتعد مدينة مناسبة جدا لقضاء شهر العسل 

أهم الانشطة والمزارات اللى لازم تجربها فى مارماريس :

-الاستمتاع بأماكن التسوق حيث ان التسوق في مارماريس تجربة ممتعة وأفضل أماكن للتسوق في مارماريس:

أونتاش بوينت سينتر Untash Point Center - نيتسيل مارينا مول Netsel Marina - البازار الكبير Grand Bazaar 

-الاستمتاع ب أكوا دريم الحديقة المائية في مارماريس الموجودة أعلى المرتفعات و اللي هتستمتع بالمناظر الطبيعية في المدينة اثناء اللعب 

-زيارة جزيرة كليوباترا واللى بتتميز بالطبيعة الساحرة والبحر والرمال الناعمة ووجود عدد من الأطلالات ترجع للعصر الروماني 

-زيارة مدينة باموكالي والمكان دة عبارة عن بحريات مدرجة على الجبل كونتها الطبيعة في مئات السنين والمية بتاعتها غنية بالكالسيوم يعني الفيو روعة وكمان سياحة علاجية و هتلاقي مدينة هوبولوس التاريخية مدينة اغريقية قديمة اتعملت فوق الجبل

التمشية فى شوارع مارماريس والميناء  والاستمتاع بالشواطي الرائعه 

مدينة باموكالى

جزيرة كليوباترا

وبكدة يكون مقالنا انتهى ونكون اتكلمنا عن 4 مدن لازم تختار ما بينهم لقضاء شهر عسل فى تركيا 

لو حابب تعرف اكتر عن مزارات تركيا والمعالم السياحية بها ممكن تشوف المقال دة من هنــــــــــــا .