سفرية تركيا تعتبر اسهل سفرية للمصريين وتاشيرتها سهله و مصاريفها قليله واللي بيسافروا لتركيا سواء للشوبنج او للمزارت التاريخيه المهمه كلهم بيجمعوا انها بلد جميله و نظيفه و منظمه جدا وليها بنية تحتيه قوية لكن عيبها فرق اللغه لان الاتراك نادرا ما بيعرفوا

لغه غير لغتهم وعندهم طباع غير محببه لنا كعرب زى عصبيتهم.

 

تركيا عاصمتها السياسية انقرة, عاصمتها التاريخيه و السياحية اسطنبول

اسطنبول فيها شبكة مواصلات قوية جدا مش هتحتاج غير تذكرة المترو عشان تتحرك فيها بسهوله جدا

افضل مناطق الاقامة فى اسطنبول هى :  منطقة تقسيم لمحبى الشوبنج و منطقة السلطان احمد لمحبى المزارات و التاريخ.

 

اهم المزارات والمعالم السياحية فى تركيا :
 

- تقسيم :

ساحة ميدان تقسيم الشهيرة و شارع استقلال لمحبى التسوق و الحياة الليلية وموجود فى شارع الاستقلال دى مكان اكثر من رائع وهو  متحف الشمع : ودة من اجمل الحاجات اللى ممكن تشوفها فى السفرية "دخوله ب ٥٦ ليرة"  موجود في شارع 

الاستقلال على اليمين وانت داخل من ميدان تقسيم 
 
-منطقة السلطان احمد :

الجامع الازرق (السلطان احمد) - ايا صوفيا - المتحف الاسلامى - قصر و متحف توبكابي اللى فيه أثر النبي - سوق الجراند بازار - و اعمدة الي رابيتان (خزان البازليك او خزان الكاتدرائية) و ده عبارة عن بحيرة مبنية تحت الارض

-ميدان امين اونو :

اللى فيه ميناء امين اونو و منه ممكن تاخدوا رحلات مضيق البسفور - و الجامع الصغير يني كامى اللى فيه الحمام مبيسبش ساحاته - و جسر غلاطة وده الكوبرى اللى بيعدى فوق المضيق زى قصر النيل عندنا كده - السوق المصرى او ميسير

جارشى لمحبى التوابل و البضاعة الرخيصه  -  برج غلاطه الشهير اللى من ارتفاعه تشوف المضيق واسطنبول

-قبطاش :

و فيها ميناء تانى مهم منه ممكن تاخدوا رحلاب بالعبارة لبورصه و بالقرب منه واحد من اهم مزارات تركيا عموما وهو قصر الخلافة دولما باهتشة Dolmabahçe

-الجانب الاسيوي :

الجزء اللى فى قارة اسيا من اسطنبول مميز والناس اللى بتروح مش بتهتم بيه اوى مع ان فيه مناطق جميله جدا زى مرتفع تشاميليجا (تل العرايس) - ميني تورك و دى عبارة عن حديقة فيها معالم تركيا مصغرة وممكن تتمشى على كورنيش

اسكودار لحد ما توصل برج الفتاة .. التصوير هناك حلو و ممكن تاخد مركب ب ٢٠ ليرة تدخل البرج.

- منطقة السلطان أيوب :

اللى فيها ضريح سيدنا ايوب الانصارى - و فيها التلفريك و منطقة المدافن بالاضافة الى انها قريبه لواحد من اهم و اكبر الجوامع فى تركيا مسجد محمد الفاتح.

- جزيرة الاميرات :

9 جزر جميلة في وسط البسفور بيتم تنظيم الرحلات ل 4 منهم أهمهم بيوك اضا اللى مجازاً بيتقال عليها جزيرة الاميرات و دى ممكن يتنظم لها رحلة نصف يوم من ميناء يني كابي او باكيركوي تتفرجوا فيها على مضيق البسفور و متنسوق

تلعبوا مع طيور النورس و تحدفولها حتت عيش . او تركب حنطور يلف بيك الجزيرة ب ٧٥ ليرة 

طريقة الوصول ليها : 
ترام لحد محطة كباتاش فى اتجاه امين اونو  تاخد معدية أو مركب كبيرة ب ٧ ليرة و نص الإتجاه الواحد. 
 

- فلوريا:

و دى المنطقة الأحدث من اسطنبول فيها حديقة جميلة جدا و المتحف المائى الاكواريوم اللى من اجمل المتاحف المائية فى العالم ومزار سياحى رائع.

- نهر ترابيا و غابات بلجراد :

و دى تعتبر بره اسطنبول لكنها قريبة نسبيا 25 كم تقريبا والوصول إليها سهل.

اخيرا الشوبنج :

منطقة تقسيم فى مولات مميزه جدا زى جواهر أو جفاهر زى ما ينطقوها و ده فى الدور الارضى منه محطة مترو شيشلي و مول اوليفيوم في منطقة زيتنبورنو و مول استينيا بارك.
 
البرنامج المثالى لبلد زى تركيا بيعتمد انت مسافرها ليه …  لو للشوبنج بس فأسطنبول هتكون كافية لكن لو نفسك تشوف طبيعة و مزارات سياحية اكتر لازم تروح بلاد تانيه مميزه غير اسطنبول زى :

-بورصة :

عشان تشوفوا جبل اولوداغ اللى بتغطى بالتلج فى الشتا و البيوت المميزة اللى على الجبل والشجرة الكبيرة اللى من الأقدم في العالم. الوصول ليها بالعبارة سهل جدا من ميناء قبطاش او امين اونو او الميناء الرئيسي.  والطريق بيكون ساعتين بالمركب الكبيرة ب ٢٩ ليرة.

- بولو :

اللى فيها طبيعه جميله جدا و بحيرة رائعه اسمها ابانت وليها رحلات سياحية من اسطنبول.

-كبادوكيا :

المشهورة برحلات البالون الطائر و الطبيعة الجبلية و منطقة جوريمي goreme

-باموكالي :

اللى فيها الينابيع الحارة الشهيرة اللى لونها ابيض زى الثلج فى منطقة دنزيلي

-انطاليا :

لمحبي البحر الأبيض المتوسط مع العلم انها مدينة تتحدث العربية بطلاقة زى جنوب تركيا عموما و زيها فى الطبيعه داليان و مرمريس.
 
 
بالنسبة للمواصلات بالمترو أسهل كتييير و تقدر تعرف الطريق اللى ممكن تاخده بالمترو لأى مكان عن طريق ابليكشن اسمه trafi او فى ابليكشن تانى اسمه  moovit بيوصلك لاي مكان ويقولك تركب ايه ومنين وتحتاج وقت قد ايه عشان توصل سواء مترو او باصات او مشي و تنزل في انهى محطه وبيديك تنبيهات قبليها كمان ..و ابعد على قد ما تقدر عن ال taxi لأنهم استغلالين 
 
اما لو عاوز تعرف اكتر عن فيزا تركيا و التصريح الامنى اقرا المقال دة هتلاقى فيه كل حاجة محتاج تعرفها بخصوص الموضوع دة  :  https://bit.ly/2sNwguK