أهم الاماكن السياحية فى القاهرة لقضاء يوم ممتع

معالم سياحية  وخروجات عليك بزيارتها فى القاهرة 

=====================================================================

من أجمل الحاجات في القاهرة إنها مزيج من القديم على الجديد، يعني تلاقي جنب المعمار العتيق الأثري ناطحات سحاب حديثة، وجنب القهوة اللي من أيام الملك٬ تلاقي كافيه عالمي إيطالي ولا أمريكاني. وده مابـيعبرش عن حتى جزء ضئيل من غنى وتنوع الحضارة الموجودة في القاهرة.

وإحنا من آلاف الحاجات اللي ممكن تتعمل وتتشاف في القاهرة اخترنا لك دول ٬ وفي رأينا هما ما يتفَوِتوش، بس الأكيد كمان إنهم ما يكَفوش ، وده لإن القاهرة مدينة عمرك ما هـتشبع منها ولا حتى تقدر تستنفذ كل اللي ممكن تقدمهولك. ودى اهم اماكن الخروج والاماكن السياحية فى القاهرة . 
 

1- الاهرامات 

  أي سايح في العالم لما بـ يسمع اسم "مصر" ، أول حاجة بـ تيجي على باله هي الأهرامات.  ويمكن تكون شُفتها في أفلام كتير ،  لكن إنك تشوفها على الطبيعة فـ ده شيء تاني خالص. الأهرامات العملاقة ديه اتبنت كقبور

مجهزة لفكرة البعث والحياة بعد الموت سنة 2560 قبل الميلاد.
 

اسعار دخول الاهرامات بتكون للمصرى 20 جنيه - الطالب 5 جنيه اما الاجانب سعر الدخول بيكون 120 جنيه 

اسعار دخول الهرم الاكبر بيكون 20 جنيه للمصرى و 10 جنيه للطالب و200 جنيه للأجانب 

ومواعيد الزيارة للاهرامات بتبقى من الساعه 7 صباحاً حتى الساعه 5 مساءاً 

2- بعد الأهرامات تيجي مصر القديمة

 وآثارها القبطية اللي فيها كنائس من القرن الخامس ومعالمها جذابة وجميلة جداً. وعشان تشوف حاجة يمكن القاهريين نفسهم ميعرفوهاش، روح سوق الجمال اللي اسمه "برقاش" وده سوق للتجارة عمره آلاف السنين.
 

3-  ولو تقدمنا بالزمن شوية هـنوصل للعصر الفاطمي (منطقة القاهرة الفاطمية )

العصر اللي ساب في القاهرة يمكن أهم المعالم في تاريخها. وبالتالي القاهرة الفاطمية لازم تكون محطتك الجاية، وعشان تشوف أعظم معالمها إتمشى في شارع المعز

بمعماره العتيق الساحر ومشربياته الدقيقة الجميلة ،  اللي بـ تحكي عن حضارة ليها سماتها وطعمها المميز. إتفرج على «بيت السحيمي» المبني في القرن السابع عشر و دايماً دلوقتي يستضيف حفلات وعروض ثقافية متنوعة

أسبوعياً. ومش بعيد عن شارع المعز هـ تلاقي سوق «خان الخليلي»؛ وده سوق رائع لكل ما هو شرقي٬ مصري، وكمان عربي٬ وخاصةً الفضة. روح هناك وأكيد هـ تلاقي حاجة تحب تقتنيها وتفكرك بالقاهرة ٬ لكن الأكيد إنك

لازم تفاصل عشان تاخد سعر مناسب. ولا غنى عن سهرة في الحسين على قهوة الفيشاوي في أجواء تاريخية وجميلة.

4- «قلعة صلاح الدين»

قلعه صلاح الدين  مكان سياحى وخروجه حلوة جدا  ، والقلعة اتبنت في القرن الـ 12 لكن بـ يغلب عليها طابع أحدث شوية بسبب بناء «مسجد محمد علي» في أوائل القرن الـ 19. على هضبة عالية كاشفة من فوقيها

القاهرة بحالها٬ القلعة مكان عمران بالمصريين والسياح. وعلى بعد كام كيلومتر هـ تلاقي «الأزهر ﭘـارك»، وده منتزه ضخم في موقع استراتيجي بـ يمتع زواره بمنظر للقاهرة من ارتفاع بـ يطل على المدينة صاحبة الألف مئذنة

وكمان كاشف أسطح عشوائية وعتيقة كتيرة٬ ده غير المساحات الخضراء الواسعة المزينة بالنوافير والأزهار.

واسعار دخول القلعه بتكون 20 جنيه للمصرى ، 5 جنيه للطالب ، 100 جنيه للاجانب 
ومواعيد الزيارة بتكون من 9 صباحا ل 5 مساءاً
 

5-  كورنيش المقطم  

وده ما بـيطلش لا على نهر ولا بحر ، بس بـيطل على القاهرة نفسها. هو عبارة عن هضبة عملاقة بـتشوف وانت عليها بحر من الأنوار في الأفق في منظر إستثنائي، 

وعشان كده المصريين بـ يتعاملوا معاه على انه كورنيش للفسحة والتمشية  ،  لكن ده الحركة مابـتبتديش فيه قبل الساعه 11 بالليل ،  والهضبة الساحرة دي أقباط مصر بـ يؤمنوا انها انتقلت من مكان قرب البحر لمكانها الحالي بمعجزة.

6- ومن الأماكن اللي ما ينفعش إنك تفوتها هو مجمع الأديان.

ولان مصر بلد موقعها محوري ومثال حي لتقابل الحضارات والأديان. المجمع ده فيه دور عبادة قديمة للثلاث أديان السماوية: اليهودية٬ الإسلام والمسيحية. وفيه هـتلاقي مسجد «عمرو بن العاص» أول مسجد يتبنى في مصر وأفريقيا. وهـتلاقي كمان كنائس مر عليها سيدنا عيسى وأمه مريم٬ والمعبد اليهودي اللي تعبد فيه سيدنا موسى على أرض مصر.

7- المتحف المصري العظيم

 والمتحف ده لي  أهمية بالغة لسببين: الأول إنه بـ ينافس المتحف البريطاني والـ «لوفر» بالـ136 ألف أثر فرعوني اللي معروضين فيه ،

وده غير الآلاف اللي في المخازن. السبب التاني إنه بقى له في ميدان التحرير العظيم اللي شهد الثورة المصرية الأخيرة فوق الـ 100 سنة ،  وده ميدان زيارته واجبة.

اسعار دخول المتحف المصرى 20 جنيه للمصريين والعرب  و 5 للطبلة  .  و 40 جنيه للدخول مقابر المومياوات للفرد العادى ، 20 جنيه للطالب . 

اسعار الدخول للاجانب  120 جنيه للمتحف ، 150 جنيه للمومياوات او 240 جنيه تذكرة مجمعه للاجانب 

مواعيد الزيارة من 9 صباحا : 5 مساءا 
 

8-  ساقية الصاوي 

أما النهارده ، فمصر الحديثة لا تقل غنى وعراقة عن أيام ما الفراعنة كانوا رواد في العلوم والفنون ،  فالشعب المصري صاحب الثورة الشعبية التاريخية اللي مافتش عليها شهور عنده كتير يقدمه للسياح. فيه مراكز ثقافية

حديثة كتيرة جداً٬ منها ساقية الصاوي  وهناك ممكن تحضر حفلات لفرق ومغنيين جداد من اللي بـيقدموا إبداع جديد ومتميز٬ ده غير العروض اللي بـتقدمها الأوبرا النشطة جداً ، وتقدر دايماً تعرف اللي بـيتعرض في الإتنين من

خلال أجندة الموقع بتاعهم .

9- كوبري قصر النيل 

الفسح والخروجات هما والضحك والفرفشة من تخصصات الشعب المصري الصميمة ! وبجنيه او ألف هـتعرف تنبسط في القاهرة٬ ومن الفسح القاهرية الأصيلة: التمشية على كوبري قصر النيل اللي بـ يوصِل حي الزمالك الراقي بالميدان الحيوي، ميدان التحرير.
 

10- جولة بمركب شراعية فى النيل    

من الفسح برضه إنك تاخد فلوكة (مركب شراعي) في النيل من كورنيش جاردن سيتي أو من كورنيش المعادي. وديه بـتبقى رحلة نهرية في نهر عتيق وسط واحدة من أكثر عواصم العالم حيوية وتأثير.