علشان كلنا عارفين ان احلى جو فى السنه تقدر تروح فى اماكن كتير فى مصر هو جو الخريف والشتا احنا جبنا لكم برنامج هيخليك تلف جنوب سيناء وتزور احلى المحميات فيها .. 
 

برنامج رحلة لمحميات جنوب سيناء ودهب وطابا ومحمية ابو جالوم ومحمية راس محمد

البرنامج دة من البرامج المميزة والممتعه للرحلات المتخصصة لمحميات سيناء علشان مع بداية الخريف لحد الشتا  تستمتع برحلة لأجمل واروع بقاع مصر (الرحلة هتكون كل يوم زيارة تفصيلية لمحمية مختلفة) وكمان التوقيت

دة مناسب جدا لنزول البحر وكمان الاستمتاع بدهب اكتر من ايام الصيف والزحمة .

مبدأيا قبل ما نقولك على برنامج الرحلة نحب ننوه ان البرنامج دة مقترح هنكلمك عن فندق متوسط فى دهب بس ممتاز وعن تجربه وهننزل لكم صور لي والبروجرام اللى ممكن تغيير شويه فى تفاصيله او تختار

حاجة تانيه مناسبه ليك او تنفذه بالظبط زى مانت حابب .
 

اليوم الاول : ( الاستمتاع بجمال دهب - زيارة شاطئ اللاجونا - عمل سفارى بالبيتش باجي )

التحرك هيكون لدهب و اول ما هتوصل دهب هتروح ع فندق  جنة سينا (3 نجوم) على البحر مباشرة قريب من الممشى ووسط البلد هتستلم الغرف  وبعدها هتغير هدومك  وتستعد عشان تنزل على بلاج الفندق الرملى التحفة

واللى يعتبر اجمل بلاج فى دهب والشاطئ الرملى الوحيد فى دهب لانه على اللاجونا على طول و هتستمتع بالبلاج فى جو دهب الدافئ وفى اليوم الاول هيكون عندك وقت تعمل سفارى بيتش باجى سواء شروق او غروب .

وبعدها هترجع للفندق تتعشى وتبات . ودى صور الفندق 

 

فندق جنة سيناء بدهب

فندق جنة سيناء بدهب

فندق جنة سيناء بدهب


 
اليوم التانى : ( زيارة محمية ابو جالوم - جولة فى الممشى السياحي )

هتتحرك بالجمل الى محمية رائعة عمرك ما هتنساها ومغامرة هتعجبك وهى زيارة محمية ابو جالوم .. والتحرك بالجمل هيكون وانت رايح ، بس وانت راجع هترجع بالانش السريع ،  هتمشى على البحر والجبال بالجمل لمدة ساعة ونصف تقريبا وبعدها هتتعشى بالفندق والمبيت. (ال مش حابب يركب الجمل ممكن يروح فى الذهاب والعودة بالانش ) وبالليل عندك جولة حرة للذهاب الى السوق والممشى السياحى 
 

اليوم التالت : ( زيارة محمية راس محمد - الاستمتاع  بجمال غابات المانجروف وشق الزلزال - زيارة الخليج الخفى - جولة حرة فى دهب )

بعد الافطار التحرك هيكون بسيارات صغيرة 14 راكب لزيارة اجمل محمية طبيعية و منطقة تراث طبيعى عالمى (محمية راس محمد شرم الشيخ ) وهتلف فى المحمية ونشوف البوابات الحجرية وشق الزلزال والخليج

الخفى وغابات المانجروف والبانوراما . هتتفرج على اماكن عمرك ما هتنسى جمالها فى حياتك وهننزل بلاج رملى هناك حلو جدا جدا وهتستمتع باليوم ان شاء الله . وبعد كدا هنتحرك على الفندق فى دهب وتاخد وجبة العشاء

وتعمل جولة حرة بدهب .

اليوم الرابع : ( التوجه الى طابا - زيارة قلعه صلاح الدين - جزيرة فرعون - خليج الفيورد )

هتفطر وتتحرك بالشنط بتاعتك على طابا اجمل بقاع مصر ( الزيارة دى بتكون على حسب امكانية زيارة القلعة او اغلاقها ) يعنى لو قلعة صلاح الدين الايوبى فى اليوم ده متاحة للزيارة يبقى هتروح طابا وتزور

القلعة وتطلع على الجزيرة .. ولو مغلقة يبقى مش هتقدر تروح وده بيكون لدواعى امنية او مناخية . وهتبتدى تاخد المركب وتتحرك على جزيرة فرعون وتطلع قلعة صلاح الدين فى طابا وسط البحر وهتشوف المكان الوحيد اللى

بيشرف على حدود أربع دول (مصر / الأراضى المحتلة / الأردن / السعودية) وبعدها هتتحرك عشان تزور خليج الفيورد وتتصور وتشوف اجمل المناظر الطبيعية الخلابة فى مصر وبعدها هترجع على الأتوبيس ومن طابا هتتحرك عشان تستعد للعودة ..
 
برنامج الرحلة دى كامل لو بالانتقالات والاقامه فى الفندق بتكون (  4 ايام 3 ليالى بغرف زوجية او ثلاثية بوجبتى الافطار والعشاء بوفيه مفتوح ) وزيارة المحميات كاملة فى جنوب سيناء  ممكن كل دة يكلفك للفرد سعر يتراوح ما بين 2000 جنيه لـــ  2400 جنيه 

وبأمكانك تقرر ان كنت عاوز تنفذه لوحدك او تروح تبع شركة سياحه .. 
 
ملحوظات هامة

* اقترحنا كان لفندق متوسط المستوى (مستوى المطعم والاقامة والبلاج محترم) لانك هتخرج كل يوم من الصبح الساعة 7 ص الى الساعة 6 المغرب وبالتالى مافيش اى مجال للاقامة بالفندق مع العلم ان الفندق ظريف جدا

والمطعم حلو والغرف نظيفة وعلى البحر ومستواه فوق المتوسط وليه بلاج رملى جميل جدا .

الرحلة دى مناسبة اكتر للشباب لان البرنامج شاق شوية ولو فى اطفال ممكن يكون البرنامج بدون مغامرة ركوب الجمل .
 

ودي  معلومات وصور عن محمية ابو جالوم : 

محمية ابو جالوم والبلولاجون (البحيره المسحوره)..مدينة دهب .. جنوب سيناء ..

ده مكان معزول في مدينة دهب مينفعش تروحه غير باللانش او الجمل زى ما قولنا

هتشوف هناك طيور مشوفتهاش خالص قبل كده حوالي أكتر من 40 نوع طيور ...

المحميه فيها حوالي 165 نوعا من النباتات، منها 44 نوع لا توجد إلا في المنطقة دى وبس ، يعني لو جتلك الست البدوية تبيع لك أعشاب إعرف الاعشاب دي بتفيد في ايه و إشتري منها دي حاجه مضمونه مش موجوده في اي حته في الدنيا ..

بالنسبه للغوص المحمية فيها نظام كهفي تحت الماء يمتد لأعماق تصل لأكثر من 100 م بتجذب الغواصين من كل أنحاء العالم .. يعنى المكان دة من الاخر أفضل مكان للاستجمام والروقان .

 

محمية ابو جالوم

محمية ابو جالوم

محمية ابو جالوم

ودة مقال كامل عن محمية رأس محمد بالتفصيل : ( ما تحتاج معرفته عن محمية راس محمد )

 

ودى بعض الصور للمكان الرائع دة : 

 

محمية راس محمد بشرم الشيخ

شق الزلزال محمية راس محمد

اشجار المننجروف محمية راس محمد

الخليج الخفى محمية راس محمد

 

واخيرا دى صور ومعلومات عن مدينة طابا الساحرة

 

جزيرة فرعون .. أو .. قلعة صلاح الدين  طابا .. سينا : ⁦هي جزيرة مرجانية تبعد 8 كم عن طابا جنوباً ..  ومعروفه بقلعة صلاح الدين التي تعتبر أهم الآثار الإسلامية في سيناء

 

أنشأها صلاح الدين الأيوبي في أواخر القرن الثاني عشر الميلادي .. وقد أقيمت لتأمين خليج العقبة ضد الغزوات الخارجية .. وتأمين طريق الحج وطرق التجارة .. وخاصة بعد محاولة أمير الكرك و ألد أعداء صلاح الدين

 

"ريجينالد" فتح بلاد العرب والاستيلاء على مكة والمدينة .. فبعد أن نجح الملك العادل أخو صلاح الدين في دحض محاولاته .. قرر الناصر صلاح الدين إقامة هذه القلعة لمراقبة المنطقة.

 

أقيمت القلعة على نتوأين بارزين بأرض الجزيرة .. أحاطتهما الأسوار والأبراج للحماية والمراقبة .. وتحوي القلعة ثكنات للجند وصوامع لتخزين الطعام وأماكن لتخزين الذخيرة والسلاح وحجرات للمعيشة .. بالإضافة لخزان للمياه

 

وحمام ومسجد .. كما عثر بها على أماكن أبراج الحمام الذي استخدم لنقل الرسائل في العصور الوسطى ودى بعض الصور للقلعة صلاح الدين وجزيرة فرعون وكمان هتلاقوا صورة خليج الفيورد 

 

قلعة صلاح الدين

جزيرة فرعون

خليج الفيورد باى

 

ودة مقال كامل عن طابا : ( تعرف على اهم مزارات طابا السياحية )