واحة سيوة هى لؤلؤة الصحراء وجنة الله على ارض مصر

روحت واحة سيوة قبل كدة ؟؟؟ 

لأ ..احنا من خلال المقال دة هنشرحلك كل حاجة فى سيوة و اول ما تخلص قرائته هتبقى عاوز تروح هناك هنوضحلك ازاى تستغل وقتك وايه اهم المزارات وافضل الاكلات السيوية وممكن كمان تشترى ايه من هناك

-اولاب ازاي تروح سيوه؟

مفيش مواصله مباشره لسيوه فهتحتاج تركب اي سوبر جيت لمرسي مطروح و تنزل في طريق مدينه الحمام او تنزل موقف الاتوبيسات بتاع مرسي مطروح و هتلاقي عربيات لسيوه.

-ثانيا اماكن الاقامه

في فنادق كتيره و باسعار مختلفه

بس الاشهر هناك هو Siwa shali طبعا ميزه الفندق انه الغرف علي الطراز السيوي المودرن و فيه عين كبريتيه سخنه خاصه بالفندق و حمامين سباحه بس محدش مسافر سيوه عشان يعوم في حمام سباحه.

المطعم يعتبر كويس .

عيبه انه بعيد جدا عن اماكن المزارات و وسط المدينه فلازم ترتب مع الفندق علي توفير انتقالات او ترتب في وسط المدينه مع شخص متفق معاه علي الاسعار يجي يخدك و يرجعك الفندق و هناك ممكن تتفق مع عربيه سوزوكي 7 راكب او تروسيكل و فاصل في السعر.

*ملحوظه مهمه علي الفنادق

في كل فنادق سيوه هتشم ريحه للمياه اللي نازله من الحنفيات او الدش و ديه ريحه المياه الكبريتيه اللي اهل سيوه عايشين منها و طبعا هي مش مضره لبشره بس بتنشف الشعر.

-ثالثا المزارات و الرحالات

اهم رحله في سيوه هي رحله السفاري و الي بتقضي في الصحراء يوم كامل بعربيات 4*4 و بتزور العين البارده و السخنه فيفضل يكون معاك المايوه و فوطه و هتلعب بالساند بورد و تتزحلق علي الرمال الناعمه و تعمل حسابك انك بتحضر الغروب في الصحراء و بيكون منظر روعه.

تاني يوم ممكن تروح مدينه شالي سيوه و هي من اقدم المدن المعروفه و من هناك اجر عجله بتكون في حدود 30 جنيه و خودها و اطلع جبل الموتي و اتفرج علي سيوه من فوق و بتكون علي بعد 25 دقيقه بالعجله و هناك هتتفرج علي المدافن الفرعونيه اللي لسه فيه منها بالالوان و تذكره دخول الجبل ب 10 جنيه.

-معبد اسكندر

كمل بالعجله 15 دقيقه من جبل الموتي بعد كده و اطلع علي معبد اسكندر و الي فيه الكهنه اعترفوا ان اسكندر ابن الرب و نصب ملك علي مصر.

-عين كيلوبترا

خد العجله 20 دقيقه و اطلع علي عين كيلو بترا و انزل عين الكبريتيه و استمتع بالجو هناك و يفضل تقعد في كافيه عبده و تشرب عصير رمان و ده اشهر حاجه هناك و هتلاقي حمام لو عايز تغير هدومك.

بعد ما تخلص قعدتك في العين رجع العجله الي مدينه شالي مطرح ما جبتها و هتسوق حوالي 30 دقيقه.

-عين فطناس 

بعد اما تخلص المزارات الي فوق فلازم تروح تحضر الغروب في اهم مكان في سيوه و هو جزيره فطناس وسط النخل و البحيره و هتلاقي هناك عين كبريتيه انزل فيها و البحيره هناك امان ممكن تنزل فيها بس مشكلتها انك مهما دخلت لجوه البحر فالارتفاع مش يوصل لركبتك يعني مفيش حد ممكن يغرق هناك حتي لو متعرفش تعوم.

و انت هناك لازم تشرب ميلك شيك بلح و ده سعر الكبايه 20 جنيه و خليه يكتر التمر فيه.

*ملحوظه

هتلاقي و انت داخل الجزيره 2 كافيتيريا فلازم هتقعد و تطلب اي حاجه تشربها من هناك و اقل سعر هو 20 جنيه.

-بحيرات الملح

و ده من الاماكن المعروفه جدا و لازم تعدي عليها و هناك هتشوف البحيرات الي بينتجوا منها الملح و تتصدر لخارج عشان افضل خامه بتطلع من العالم كله هو سيوه فهتحس تلج وسط مياه فيروزيه شفافه.

-فندق اميرال

و ده اشهر فندق في العالم و بيدخله الملوك و الامراء و الليله فيه بتوصل الي 750 دولار و الفندق ده معروف انه مفيهوش كهرباء و لا غاز عشان كده يغتبر فندق صديق لبيئه.

-رابعا الاكلات السيويه

لازم تعمل حسابك انك تاكل اهم اكله عندهم و هي الفراخ المردم او الي بنسميها مدفونه تحت الرمل و ديه حلاوتها في التتبيله بتاعتها و طبعا المكان الي هتروحه لازم توصي فيه قبلها بحوالي ساعتين عشان بتاخد سوي تحت الرمل حوالي ساعه و ربع و اطلب جنبها ملوخيه ناشفه و طاجن خضار و رز.

-اللحمه بالصلصه ..اللحمه هناك طعمها تحفه و بتدوب في البق و خد معاها كسكسي و طاجن بطاطس.

-طاجن فراخ..و ده بيكون برام قطع فراخ بالزاتون السيوي و الصلصه و الفلفل و طعمه وهم و يفضل تاخد كسكسي معاه من غير طاجن خضار.

-شاي الزرد و ده الشاي التقليدي لسيوه بيتعمل بحشيش الليمون علي الفحم و بينزل في براد و معاه كبايه حجمها 4 سم

-خامسا اهم المنتجات الي تشتريها 

اولا منتجات الاكل

هتنزل وسط البلد و تدور علي محل اسمه الجوهره

و تشتري منه بالترتيب :

مربي بلح و مربي كركاديه و مربي زيتون اسود ايوه زي ما بقولك كده مربي زيتون اسود وهتعجبك و ميزيتها ان الكروسترول بتاعها ضعيف جدا 

سعر البرطمان هيقولك 25 جنيه و انت فاصل و خده علي 20 ده السعر الرسمي

-ملحوظه

خليه يدوقك المربات قبل ما تشتريها عشان لو معجبتكش متجبهاش.

تاني حاجه برطمانات الزاتون السيوي الاسود و الاخضر المخلل

سعر البرطمان 15 خده علي 10

في زاتون كالاماتا سعر البرطمان 25 خده علي 20

في برطمان زاتون مفروم بالاعشاب و سعر البرطمان ب 20 جنيه

-زيت الزاتون خد بالك في انواع بس احسنهم واحد ب 70 جنيه مش فاكر نوعه الصراحه.

-البلح السيوي باللوز 

و ده من اجمل الحاجات هناك الي ممكن تشتريها و تهادي تصحابك منها عشان مميزه و هتلاقي علب جاهزه.

-منتجات الملح

و ديه من المنتجات المهمه هناك و بتكون عباره عن منتجات مصنوعه بالملح فتمتص الطاقه السلبيه و في منها علي شكل اباجوره و سعرها بيبدا من 35 جنيه

-ملحوظه

متجبش من اي مكان بره وسط البلد عشان هتلاقيها بره غاليه يعني بلاش تيجيبها من عين كيلو بترا.

-هتلاقي مثلا في مدينه شالي سعر الاباجوره ب 45 جنبه فخودها ب 35 جنيه.

-الملابس السيويه و المنسوجات.

و ديه اغلي حاجه في سيوه عشان بتكون صناعه يدويه. 

لو عاوز برنامج سياحى لواحة سيوة 3 ايام / ليلتين ممكن تقرا المقال دة : https://bit.ly/2JdmtnX

المصدر : صفحة افضل اماكن الفسحة والخروج فى مصر